રાજકોટ જિલ્લાના ઉપલેટા પંથકમાં કૌટુંબિક સંબંધોને કલંકિત કરતી સનસનાટીભરી હત્યાની ઘટના સામે આવી છે. ભાયાવદર પોલીસ સ્ટેશન હેઠળ આવતા પડવલા ગામે કૌટુંબિક કાકા અદ્રેમાન નોયડા અને ભત્રીજા સોહીલ અયુબ નોયડા વચ્ચે કોઈ સાધારણ બાબતે વાતચીત શરૂ થઈ હતી. જોકે, જોતજોતામાં આ બોલાચાલી ઉગ્ર સ્વરૂપ ધારણ કરી ગઈ હતી.
ઉપલેટાના પડવલા ગામે લોહિયાળ ખેલ
ગુસ્સામાં અંધ થયેલા ભત્રીજા સોહીલ નોયડાએ કૌટુંબિક મર્યાદાઓ ઓળંગીને પોતાની પાસે રહેલી તીક્ષ્ણ છરી વડે કાકા અદ્રેમાન પર ઝાટકા મારવાના શરૂ કરી દીધા હતા. એક પછી એક છરીના જીવલેણ ઘા વાગવાને કારણે અદ્રેમાન નોયડા લોહીલુહાણ થઈ ઘટનાસ્થળે જ ઢળી પડ્યા હતા અને તેમનું મૃત્યુ નીપજ્યું હતું. હત્યા કર્યા બાદ આરોપી સોહીલ સીમ તરફ ભાગી છૂટ્યો હતો. બનાવની જાણ થતાં જ ભાયાવદર પોલીસ કાફલો તુરંત જ પડવલા ગામે દોડી ગયો હતો. ગામમાં ભયનો માહોલ ન ફેલાય તે માટે પોલીસે તાત્કાલિક અલગ-અલગ ટીમો બનાવી સીમ વિસ્તારમાં કડક નાકાબંધી અને સર્ચ ઓપરેશન હાથ ધર્યું હતું.