વલસાડ નજીક આવેલા સંઘપ્રદેશ નાની દમણના દરિયાકિનારે ચોમાસાના તોફાની વાતાવરણ વચ્ચે એક કરુણ દુર્ઘટના ઘટી છે. પ્રશાસન દ્વારા દરિયાકિનારે જહાજો કે પર્યટકો માટે પ્રવેશ પર કડક પ્રતિબંધ ફરમાવવામાં આવ્યો હોવા છતાં, 4 યુવકોનું એક જૂથ નિયમો નો અનાદર કરીને દરિયામાં નહાવા પડ્યું હતું.
દરિયાકિનારે 2 યુવકો પાણીમાં ખેંચાઈ ગયા
દરમિયાન, દરિયામાં ઉછળેલા તોફાની અને જોખમી મોજાના કારણે 2 યુવકો ઊંડા પાણીમાં ખેંચાઈ ગયા હતા. કિનારે ફરજ પર હાજર લાઇફગાર્ડે તાત્કાલિક દરિયામાં ઝંપલાવીને એક યુવકને સુખરૂપ બહાર કાઢી લીધો હતો, પરંતુ મૂળ બિહારનો આકાશ કુમાર નામનો યુવક દરિયાના ઊંડા પાણીમાં ગરકાવ થઈ ગયો હતો.ઘટનાની જાણ થતાં જ સ્થાનિક પોલીસ અને ફાયર બ્રિગેડની ટીમ તાબડતોબ ઘટનાસ્થળે દોડી આવી હતી. પોલીસ અને ફાયર ફાઇટરો દ્વારા રેસ્ક્યુ બોટની મદદથી લાપતા યુવક આકાશ કુમારને શોધવા માટે દરિયામાં સઘન શોધખોળ હાથ ધરવામાં આવી રહી છે.