દક્ષિણ ગુજરાતના વલસાડ જિલ્લા હેઠળ આવતા ઔદ્યોગિક વિસ્તાર ઉમરગામ તાલુકાના સરીગામ GIDC માંથી મોડી રાત્રે એક ભયાનક અગ્નિકાંડની ઘટના સામે આવી છે. સરીગામ GIDC સ્થિત જાણીતી ‘સુજસ લેધર’ નામની ઉત્પાદક કંપનીમાં અગમ્ય કારણોસર અચાનક ભીષણ આગ ભભૂકી ઊઠી હતી. લેધર અને કેમિકલ સંબંધી જ્વલનશીલ મટીરિયલ હોવાને કારણે આગે જોતજોતામાં રૌદ્ર સ્વરૂપ ધારણ કરી લીધું હતું અને આખી ફેક્ટરી પરિસરને પોતાના ભરડામાં લઈ લીધું હતું. ફેક્ટરીમાંથી ધુમાડાના કાળા ડિબાંગ વાદળો અને તોતિંગ જ્વાળાઓ નીકળતી જોઈને આસપાસની અન્ય કંપનીઓના કર્મચારીઓ અને સ્થાનિકોમાં ભારે દોડધામ અને નાસભાગ મચી ગઈ હતી.
5ટીમો અને 10 થી વધુ ફાયર ફાઈટરોની કલાકો સુધી જહેમત
આગ અત્યંત ઝડપથી પ્રસરી રહી હોવાથી તાત્કાલિક મેજર ફાયર કોલ જાહેર કરવામાં આવ્યો હતો. ઉમરગામ, સરીગામ, વાપી GIDC તેમજ વાપી મહાનગરપાલિકા ના અગ્નિશામક દળની 5 જેટલી સંયુક્ત ટીમો ઘટનાસ્થળે બોલાવી લેવાઈ હતી.10 થી પણ વધુ ફાયર ટેન્ડરો અને ફોર્મ ટેન્ડરો મારફતે સતત કલાકો સુધી પાણી અને કેમિકલ ફોર્મનો મારો ચલાવવામાં આવ્યો હતો. આખી રાત ચાલેલી ભારે જહેમત બાદ વહેલી સવારે આગ સંપૂર્ણપણે કાબૂમાં આવી શકી હતી.આગ એટલી ભીષણ હતી કે સુજસ લેધર કંપનીનો આખો પ્લાન્ટ, ગોડાઉન, અંદર રહેલો કરોડો રૂપિયાનો કાચો માલ, મશીનરી અને તૈયાર લેધરનો જથ્થો બળીને રાખ થઈ ગયો હતો.