વાવ થરાદ જિલ્લાના ભાભર પંથકમાં રાજકીય ગરમાવો લાવતી ભાભર માર્કેટ યાર્ડ (APMC) ની ચૂંટણી શાંતિપૂર્ણ અને ઉત્સાહભેર સંપન્ન થઈ છે. ભાભર માર્કેટ યાર્ડની નવી બિલ્ડિંગમાં કુલ 6 બુથો પર યોજાયેલા મતદાનમાં મતદારોમાં ભારે ઉત્સાહ જોવા મળ્યો હતો. સવારથી જ મતદાન મથકો પર મતદારોની લાંબી લાઈનો જોવા મળી હતી, જેના પરિણામે અંતે 96.88 ટકા જેટલું ઊંચું મતદાન નોંધાયું હતું.
મતદારોનો ઉત્સાહ અને આંકડાકીય વિગતો
ભાભર એપીએમસીની ચૂંટણી માટે યોજાયેલા મતદાનમાં કુલ 1,221 મતદારોમાંથી 1,183 મતદારોએ પોતાના મતાધિકારનો ઉપયોગ કર્યો હતો. ફોર્મ ચકાસણી બાદ વિવિધ બેઠકો માટે કુલ 73 ઉમેદવારો મેદાનમાં છે, જેમાં ખેડૂત વિભાગમાંથી 65 અને વેપારી વિભાગમાંથી 8 ઉમેદવારો પોતાનું નસીબ અજમાવી રહ્યા છે.
સાંસદ ગેનીબેન ઠાકોરે કર્યું મતદાન, પારદર્શિતા પર ભાર મૂક્યો
આ ચૂંટણીમાં બનાસકાંઠાના લોકપ્રિય સાંસદ ગેનીબેન ઠાકોરે પણ પહોંચીને પોતાના મતાધિકારનો ઉપયોગ કર્યો હતો. આ પ્રસંગે તેમણે મહત્વનું નિવેદન આપતા જણાવ્યું હતું કે, લાઇસન્સ ધરાવતા તમામ વેપારીઓને મતાધિકાર મળવો જોઈએ. APMC માં ખેડૂતો અને વેપારીઓ બંને મુખ્ય હિતધારકો છે, તેથી તેમના હિતોનું સાચું પ્રતિનિધિત્વ થવું અનિવાર્ય છે.
પારદર્શક મતદાર યાદી અને નિષ્પક્ષ ચૂંટણીની માગ
સાંસદ ગેનીબેન ઠાકોરે ચૂંટણી પ્રક્રિયા અંગે ભારપૂર્વક જણાવ્યું હતું કે, સમગ્ર ચૂંટણી પ્રક્રિયા કોઈપણ અસ્પષ્ટતા વિના પારદર્શક રીતે યોજાવી જોઈએ. તેમણે તમામ સંબંધિત મતદારોને યોગ્ય રીતે મતાધિકાર મળે અને પારદર્શક મતદાર યાદી તૈયાર થાય તેવી પ્રબળ માગ પણ કરી હતી, જેથી લોકશાહી ધોરણે નિષ્પક્ષ ચૂંટણી સંપન્ન થઈ શકે.
આ પણ વાંચો: Tharad હાઇવે પર કાળજું કંપાવનારી દુર્ઘટના, આખલો આડે આવતાં રેન્જ રોવરનો ભુક્કો, 2 ના મોત
