ચાલુ વર્ષે અલનીનોની અસરને કારણે વરસાદ ઓછો વરસ્યો છે. ખાસ કરીને સૌરાષ્ટ્ર, કચ્છ અને ઉત્તર ગુજરાતમાં વરસાદની મોટી ઘટ જોવા મળી છે.ત્યારે ખેતી બચાવવા માટે ખેડૂતો સરકાર પાસે પાણીની માગ કરી રહ્યાં છે. સરકારને નર્મદાનું પાણી આપવા માટે રજૂઆતો થઈ રહી છે. એવામાં વાવ થરાદ જિલ્લામાં પાણીની કેનાલના રીપેરિંગ માટે ખેડૂતો અનેક વખત રજૂઆત કરી ચૂક્યા છે. પરંતુ કોઈ અધિકારીએ ત્યાં ધ્યાન નહીં દેતા આખરે ખેડૂતોએ જાત મહેનત ઝીંદાબાદનું સુત્ર અપનાવી આખી કેનાલ જાતે જ રીપેર કરવા માટે શરૂઆત કરી છે.
તંત્રની બેદરકારી સામે આવતા ખેડૂતો ભારે પરેશાન થયા
વાવ થરાદ પંથકના બાલુંત્રી ગામમાં કેનાલની સફાઈ અને સમારકામ બાબતે તંત્રની બેદરકારી સામે આવતા ખેડૂતો ભારે પરેશાન થયા છે.સ્થાનિક ખેડૂતો દ્વારા વારંવાર રજૂઆતો કરવામાં આવી હોવા છતાં તંત્રએ કોઈ કામગીરી હાથ ધરી ન હતી.આખરે પાણીની સમસ્યા હલ કરવા માટે ખેડૂતો જાતે મેદાનમાં ઉતર્યા હતા અને કેનાલ રીપેરિંગની કામગીરી કરી હતી.બાલુંત્રી ગામના ખેડૂતો કેનાલની સમસ્યાને લઈને લાંબા સમયથી મુશ્કેલીનો સામનો કરી રહ્યા હતા.કેનાલની સફાઈ ન થવાના કારણે તેમજ તેમાં થયેલા ભંગાણને લીધે છેવાડાના ખેતરો સુધી પાણી પહોંચતું ન હતું.ખેડૂતો માટે સિંચાઈના પાણીની જરૂરિયાત અનિવાર્ય હોવાથી તેમણે તંત્ર સમક્ષ અવાજ ઉઠાવ્યો હતો.આ સંદર્ભે સ્થાનિક ખેડૂતોએ કેનાલની સફાઈ અને સમારકામ માટે સંબંધિત અધિકારીઓને વારંવાર રજૂઆત કરી હતી.