ગાંધી જયંતીના પવિત્ર અવસરે કેદીઓમાં સકારાત્મક પરિવર્તન લાવવા અને તેમના શારીરિક-માનસિક સ્વાસ્થ્યને સુધારવાના ઉદ્દેશ્યથી ગુજરાત રાજ્ય યોગ બોર્ડ દ્વારા વાવ-થરાદ સબ જેલ ખાતે વિશેષ યોગ અને પ્રાણાયામ શિબિરનું આયોજન કરવામાં આવ્યું હતું. આ કાર્યક્રમમાં કેદીઓએ ઉત્સાહભેર ભાગ લીધો હતો.
જિલ્લા પોલીસ વડાનું વિશેષ માર્ગદર્શન અને આહ્વાન
આ કાર્યક્રમમાં વાવ-થરાદ જિલ્લા પોલીસ વડા ચિંતન તેરૈયા વિશેષ ઉપસ્થિત રહ્યા હતા. તેમણે કેદીઓને સંબોધિત કરતા મહાત્મા ગાંધીજીના સત્ય, અહિંસા અને ઉમદા સિદ્ધાંતોના માર્ગ પર ચાલવા માટે પ્રેરિત કર્યા હતા. પોલીસ વડાએ કેદીઓને ભવિષ્યમાં કોઈપણ પ્રકારના ગેરકાયદે કે ખરાબ કાર્યોથી દૂર રહીને સારા કાર્યો દ્વારા એક ઉજ્જવળ ભવિષ્યનું નિર્માણ કરવા માટે હૂંફ અને માર્ગદર્શન પૂરું પાડ્યું હતું.
