વાવ-થરાદમાં ટેટ હાયર સેકન્ડરી (TAT HS) મુખ્ય પરીક્ષાનું પરિણામ જાહેર થયા બાદ ઉમેદવારોમાં ભારે રોષ જોવા મળી રહ્યો છે. પરિણામ સામે અસંતોષ વ્યક્ત કરતાં ઉમેદવારોએ વાવ-થરાદ કલેક્ટર કચેરી ખાતે આવેદનપત્ર પાઠવ્યું હતું. ઉમેદવારોએ મૂલ્યાંકન પ્રક્રિયા સામે સવાલો ઉઠાવી પરિણામની નિષ્પક્ષ તપાસ કરવાની માંગ કરી છે.

31 હજાર ઉમેદવારો નાપાસ થયાનો આક્ષેપ

ઉમેદવારોનો ગંભીર આક્ષેપ છે કે પરીક્ષાના મૂલ્યાંકનમાં મનસ્વી વલણ અપનાવવામાં આવ્યું છે. તેમના જણાવ્યા મુજબ, મૂલ્યાંકનની પદ્ધતિને કારણે અંદાજે 31,000 જેટલા ઉમેદવારો નાપાસ થયા છે. આટલી મોટી સંખ્યામાં ઉમેદવારો નાપાસ થતાં પરિણામની વિશ્વસનીયતા સામે પણ સવાલો ઊભા થયા છે.

પરિણામ શંકાસ્પદ હોવાનો દાવો

TAT HS મુખ્ય પરીક્ષાના પરિણામને ઉમેદવારોએ શંકાસ્પદ ગણાવ્યું છે. ઉમેદવારોના મતે, પરિણામમાં રહેલી શંકાઓ દૂર કરવા માટે મૂલ્યાંકન પ્રક્રિયાની તપાસ થવી જરૂરી છે. માત્ર પરિણામ જાહેર કરી દેવાને બદલે ઉમેદવારોના પ્રશ્નો અને રજૂઆતોને પણ ધ્યાનમાં લેવા જોઈએ તેવી તેમની માંગ છે.

નિષ્પક્ષ તપાસ અને પુનઃમૂલ્યાંકનની માંગ

આ સમગ્ર મામલે ઉમેદવારોએ વાવ-થરાદ કલેક્ટરને આવેદનપત્ર પાઠવી નિષ્પક્ષ તપાસ કરાવવાની માંગ કરી છે. સાથે જ TAT HS મુખ્ય પરીક્ષાના પરિણામનું પુનઃમૂલ્યાંકન કરવામાં આવે તેવી રજૂઆત કરી છે.


આ પણ વાંચો :   Jasdan: પાટીદાર આંદોલન અંગે દિનેશ બાંભણિયાએ વ્યક્ત કર્યો અફસોસ, “ સારા મુખ્યમંત્રીને સત્તામાંથી ઉતારવા પડ્યા "