નવસારી જિલ્લામાંથી વન્યજીવને લગતી એક ચોંકાવનારી ઘટના સામે આવી છે. નવસારીના પેરા ગામમાં એક દીપડો બેરોકટોક અને બિન્દાસ રીતે લટાર મારતો નજરે પડ્યો છે. રાત્રીના સમયે ગામની શેરીઓમાં દીપડાના આ પ્રકારે મુક્તપણે આંટાફેરા જોવા મળતા સ્થાનિક ગ્રામજનોમાં ભારે ભયનો માહોલ છવાઈ ગયો છે. લોકો પોતાના ઘરની બહાર નીકળતા પણ ડરી રહ્યા છે, અને ખાસ કરીને ખેડૂતો તથા પશુપાલકોમાં ચિંતાનું મોજું ફરી વળ્યું છે.
CCTV કેમેરામાં કેદ થઈ દીપડાની હિલચાલ
ગામમાં છેલ્લા કેટલાક સમયથી વન્યજીવની ઉપસ્થિતિ હોવાની શંકા સેવાઈ રહી હતી, જે હવે સાચી સાબિત થઈ છે. પેરા ગામના એક વિસ્તારમાં દીપડો બિન્દાસ અંદાજમાં ફરતો હોય તેવું દશ્ય ત્યાં લાગેલા CCTV કેમેરામાં સ્પષ્ટપણે કેદ થઈ ગયું છે. આ વીડિયો સોશિયલ મીડિયા અને ગ્રામજનોમાં વાયરલ થતાં જ લોકોની ચિંતા વધુ વધી ગઈ છે. દીપડાની આ અવરજવર પરથી સ્પષ્ટ થાય છે કે, આ વિસ્તારમાં તેની સતત સક્રિયતા રહેલી છે.