અમદાવાદ મ્યુનિસિપલ ટ્રાન્સપોર્ટ સર્વિસ (AMTS) માં તંત્રની ઘોર બેદરકારી અને પોલંપોલનો વધુ એક ચોંકાવનારો કિસ્સો સામે આવ્યો છે. શહેરના રસ્તાઓ પર દોડતી બે ઈલેક્ટ્રિકલ વેહિકલ (EV) બસોમાં એક જ સરખી રજીસ્ટ્રેશન નંબર પ્લેટ લગાવીને મુસાફરોના પરિવહન માટે ઉપયોગ કરવામાં આવી રહ્યો હોવાનો પર્દાફાશ થયો છે. એક જ નંબર પ્લેટ સાથે બે અલગ-અલગ બસો રસ્તા પર દોડતી હોવાની જાણ થતાં જ મનપા અને ટ્રાન્સપોર્ટ વિભાગના અધિકારીઓમાં ભારે ખળભળાટ મચી ગયો છે.
બસોના AMTS કોર્ડ નંબર અલગ, પણ પાસિંગ નંબર એક જ
તપાસ દરમિયાન સામે આવ્યું છે કે બંને EV બસોમાં AMTS દ્વારા આપવામાં આવતા સત્તાવાર કોર્ડ નંબર અલગ-અલગ લખેલા હતા, પરંતુ વાહન વ્યવહાર વિભાગના પાસિંગ નંબર (રજીસ્ટ્રેશન નંબર) બિલકુલ એક સરખા જ હતા. આ ગંભીર લોચો અને કાયદાકીય ઉલ્લંઘન સામે આવતાં જ AMTS વિભાગ ત્વરિત હરકતમાં આવ્યો હતો. સમાન નંબર પ્લેટ સાથે જાહેર માર્ગો પર બસ ચલાવવા બદલ સંબંધિત બસ ઓપરેટર સામે કડક વલણ અપનાવવામાં આવ્યું છે.