અમદાવાદના ઇસનપુર વિસ્તારમાં તાજેતરમાં બનેલી એક ઘટનાએ સ્થાનિક તંત્રની કામગીરી સામે ગંભીર સવાલો ઊભા કર્યા છે. અહીં ચોમાસા કે વરસાદ વગર જ રોડ પર મસમોટો ભુવો (Sinkhole) પડી ગયો છે, જેના કારણે રાહદારીઓ અને વાહનચાલકોમાં ભારે ભયનો માહોલ છવાયો છે. સ્થાનિક રહીશો આક્ષેપ કરી રહ્યા છે કે થોડા સમય પહેલા અહીં વિવિધ કામગીરી માટે ખોદકામ કરવામાં આવ્યું હતું, પરંતુ ત્યારબાદ રોડનું યોગ્ય રીતે પૂરણ કે રિપેરિંગ ન કરવામાં આવતા જમીન બેસી ગઈ છે. આ ઘટના સાબિત કરે છે કે કાગળ પર ચાલતા વિકાસના દાવાઓ વાસ્તવિકતામાં કેટલા પોલા છે.
નબળી કામગીરી અને કોન્ટ્રાક્ટરોની મનમાની સામે લોકોનો રોષ
ઇસનપુરના સ્થાનિક લોકોમાં રોષ ભભૂકી ઉઠ્યો છે કારણ કે તંત્ર અને કોન્ટ્રાક્ટરની મિલીભગતથી પ્રજા બેહાલ બની છે. નાગરિકોનું સ્પષ્ટ કહેવું છે કે માત્ર બેરિકેટ્સ લગાવીને કે દોરડા બાંધીને જવાબદારીમાંથી છટકી શકાય નહીં. સ્થાનિક પ્રજાની સુરક્ષાને જોખમમાં મૂકીને થતી નબળી ગુણવત્તાવાળી કામગીરી હવે સહન ન થાય તેવી હદે પહોંચી ગઈ છે. અગાઉ થયેલા અસંખ્ય ખોદકામ બાદ રસ્તાઓને પૂર્વવત્ ન કરવાની બેદરકારીના કારણે આજે નિર્દોષ નાગરિકો જીવના જોખમે અવરજવર કરવા મજબૂર બન્યા છે.