રાજકોટ શહેરમાં વાહનચાલકો અને સામાન્ય જનતા માટે માઠા સમાચાર સામે આવ્યા છે. શહેરના નાયરા એનર્જીના પેટ્રોલ પંપ પર ઇંધણના ભાવમાં અચાનક મોટો વધારો ઝીંકવામાં આવ્યો છે. આંતરરાષ્ટ્રીય સ્તરે ક્રૂડ ઓઇલ અને સ્થાનિક પરિબળોની અસર વચ્ચે નાયરા દ્વારા ઇંધણના ભાવ વધારવામાં આવતાં દૈનિક મુસાફરી કરતા વાહનચાલકોના આર્થિક બજેટ ખોરવાઈ ગયા છે.
પેટ્રોલમાં રૂ. 5 અને ડીઝલમાં રૂ. 3 નો વધારો
નાયરા પેટ્રોલ પંપ પર કરવામાં આવેલા નવા ભાવવધારા મુજબ, પેટ્રોલના ભાવમાં લિટર દીઠ રૂ. 5 નો તોતિંગ વધારો કરવામાં આવ્યો છે. જ્યારે ડીઝલના ભાવમાં પણ લિટર દીઠ રૂ. 3 નો ભાવવધારો ઝીંકવામાં આવ્યો છે. આ વધારા સાથે નાયરાના પંપ પર પેટ્રોલનો નવો ભાવ વધીને રૂ. 106.83 પ્રતિ લિટર થઈ ગયો છે, જ્યારે ડીઝલનો ભાવ રૂ. 100.66 પ્રતિ લિટર પહોંચી ગયો છે.