હવામાનમાં આવી રહેલા બદલાવ અને વાતાવરણમાં સતત ભેજને કારણે શહેરમાં વાયરલ ઇન્ફેક્શન અને મચ્છરજન્ય રોગચાળાએ માથું ઊંચક્યું છે. બદલાતા હવામાનની સીધી અસર જનઆરોગ્ય પર પડી રહી છે. અમદાવાદની સોલા સિવિલ હોસ્પિટલ સહિતની સરકારી હોસ્પિટલોમાં દર્દીઓની લાંબી કતારો જોવા મળી રહી છે. સોલા સિવિલ હોસ્પિટલમાં દૈનિક ઓપીડી (OPD)નો આંકડો 1100ને પાર પહોંચી ગયો છે, જેમાં મોટાભાગના દર્દીઓ તાવ, શરદી, ખાંસી અને શારીરિક નબળાઈની તકલીફો સાથે સારવાર માટે આવી રહ્યા છે.
ડેન્ગ્યુ, વાયરલ અને શરદી-ખાંસીની દવામાં 15% થી 20%નો મોટો ઉછાળો
રોગચાળો વ્યાપક બનતાં જ દવાઓની માંગમાં રોકેટ ગતિએ વધારો થયો છે. ખાસ કરીને ડેન્ગ્યુ, વાયરલ ફીવર, શરદી અને ઉધરસની દવાઓની ખપતમાં 15% થી 20% સુધીનો સીધો વધારો નોંધાયો છે. સરકારી હોસ્પિટલોની સાથે-સાથે ખાનગી મેડિકલ સ્ટોર્સ પર પણ પેરાસિટામોલ, એન્ટિબાયોટિક્સ, કફ સિરપ અને મલ્ટીવિટામિન્સની માંગમાં મોટો ઉછાળો જોવા મળી રહ્યો છે.