ગુજરાતમાં ઓલા , ઉબર અને રેપિડો જેવી એપ આધારિત વાહન સેવાઓનો ઉપયોગ કરનારા અને આપનારાઓ માટે એક ખૂબ જ મહત્વના સમાચાર સામે આવ્યા છે. અમદાવાદમાં આવી ખાનગી એપ આધારિત સેવાઓ દ્વારા થતા વાહનોના કોમર્શિયલ ઉપયોગ મુદ્દે ગુજરાત હાઇકોર્ટે અત્યંત કડક વલણ અખત્યાર કર્યું છે. હાઇકોર્ટે આ મામલે રાજ્ય સરકારને આડે હાથ લેતા આકરી ટકોર કરી છે અને પૂછ્યું છે કે આ પ્રકારના નિયમ વિરુદ્ધના ઓપરેશન્સ સામે સરકારે અત્યાર સુધી શું પગલાં લીધા છે?
રાજ્ય સરકારની તિજોરીને મોટું આર્થિક નુકસાન
કોર્ટમાં સુનાવણી દરમિયાન હાઇકોર્ટે સ્પષ્ટ શબ્દોમાં જણાવ્યું હતું કે, યોગ્ય પરમિટ કે કાનૂની માળખા વગર ખાનગી વાહનોનો જે રીતે કોમર્શિયલ એટલે કે વ્યાપારી હેતુ માટે ઉપયોગ થઈ રહ્યો છે, તેનાથી રાજ્ય સરકારની તિજોરીને મોટું આર્થિક નુકસાન થઈ રહ્યું છે. આ ઉપરાંત, ટેક્સ ભરીને કાયદેસર ધંધો કરતા સામાન્ય રિક્ષા અને ટેક્સી ચાલકોના રોજગાર પર પણ તેની સીધી માઠી અસર પડી રહી છે.
