પવિત્ર તહેવાર જન્માષ્ટમીને લઈને વિશ્વભરના કૃષ્ણ ભક્તોમાં ભારે ઉત્સાહ જોવા મળી રહ્યો છે, ત્યારે આ વખતે ઇસ્કોન મંદિર ખાતે કૃષ્ણ જન્મોત્સવની ઉજવણી અત્યંત અનોખી અને યાદગાર બનવા જઈ રહી છે. ઇસ્કોન મંદિરના ઈતિહાસમાં પહેલીવાર જન્માષ્ટમીના પાવન અવસરે એક વિશાળ અને આકર્ષક ડ્રોન શોનું ખાસ આયોજન કરવામાં આવ્યું છે. ભક્તિ અને ટેકનોલોજીના આ અનોખા સંગમથી આ વર્ષની જન્માષ્ટમીની ઉજવણી શ્રદ્ધાળુઓ માટે વિશેષ આકર્ષણનું કેન્દ્ર બની રહેશે.
300 ડ્રોનથી આકાશમાં સર્જાશે ભગવાન શ્રીકૃષ્ણની મોહક આકૃતિઓ
આ ભવ્ય શો દરમિયાન એકસાથે 300 જેટલા આધુનિક ડ્રોન હવામાં એકસાથે ઉડાન ભરશે અને રાત્રિના સમયે આકાશને અદ્ભુત રોશનીથી ઝગમગાવી દેશે. આ ડ્રોન્સની મદદથી આકાશમાં ભગવાન શ્રીકૃષ્ણના બાળરૂપ, માખણ ચોરી, કાલિયા નાગ દમણ તેમજ ગીતા ઉપદેશ જેવા વિભિન્ન લીલા પ્રસંગોની આકર્ષક આકૃતિઓ અને ઝલક કંડારવામાં આવશે. આકાશી કેનવાસ પર સર્જાનારા આ નયનરમ્ય દ્રશ્યો દર્શનાર્થે આવતા લાખો શ્રદ્ધાળુઓ માટે એક નવીન અને રોમાંચક અનુભવ સાબિત થશે.