ગુજરાત રાજ્યભરમાં લોકોના આરોગ્ય સાથે ચેડાં કરતા નકલી તેમજ એનાલોગ પનીર, ચીઝ અને બટરના વેચાણ સામે ફૂડ એન્ડ ડ્રગ કંટ્રોલ એડમિનિસ્ટ્રેશન (FDCA) દ્વારા લાલઆંખ કરવામાં આવી છે. તંત્ર દ્વારા શરૂ કરાયેલી આ ઝુંબેશના ત્રીજા દિવસે પણ ફૂડ વિભાગની ટીમોએ સતત તપાસનો ધમધમાટ ચાલુ રાખ્યો હતો. મિલાવટખોરોમાં ફાફડાટ ફેલાવતા આ ઓપરેશન દરમિયાન અધિકારીઓએ જુદા જુદા શહેરો અને વિસ્તારોમાં આકસ્મિક તપાસ હાથ ધરી હતી.
રાજ્યભરમાં ફૂડ વિભાગે 255 પેઢીઓમાં પાડ્યા દરોડા
તપાસની આ ઝુંબેશ દરમિયાન ફૂડ વિભાગની ટીમોએ રાજ્યભરમાંથી ડેરી પ્રોડક્ટ્સનું વેચાણ અને ઉત્પાદન કરતી કુલ 255 જેટલી પેઢીઓની ઝીણવટભરી તપાસ કરી હતી. આ દરોડા દરમિયાન ગુણવત્તા વગરના અને ભે ભેળસેળયુક્ત જણાતા 13 જેટલા શંકાસ્પદ ડેરી પ્રોડક્ટ્સના સેમ્પલ લેવામાં આવ્યા છે. આ તમામ નમૂનાઓને વધુ પૃથ્થકરણ (લેબોરેટરી ટેસ્ટ) માટે સરકારી પ્રોટોકોલ મુજબ મોકલી આપવામાં આવ્યા છે.