અમદાવાદ શહેરની વિવિધ શાળાઓને ઈ-મેઈલ મારફતે બોમ્બથી ઉડાવી દેવાની ધમકી મળતાં જ શૈક્ષણિક આલમ અને વહીવટી તંત્રમાં ભારે હડકંપ મચી ગયો છે. ધમકીભર્યો મેઈલ મળતાં જ જિલ્લા શિક્ષણ અધિકારી (DEO) તાત્કાલિક એક્શન મોડમાં આવ્યા છે અને શહેરની તમામ શાળાઓને સુરક્ષા વ્યવસ્થા સઘન બનાવવાની આકરી સૂચનાઓ આપી દીધી છે.
પોલીસનું ફિઝિકલ વેરિફિકેશન અને સુરક્ષા માર્ગદર્શિકા
ઘટનાની ગંભીરતાને ધ્યાનમાં રાખીને પોલીસ વિભાગ દ્વારા સંબંધિત શાળાઓનું ફિઝિકલ વેરિફિકેશન શરૂ કરી દેવામાં આવ્યું છે. DEO દ્વારા શાળા સંચાલકોને કડક સૂચના આપવામાં આવી છે કે કેમ્પસમાં કોઈ પણ શંકાસ્પદ વસ્તુ કે બેગ જણાય તો તેને બિલકુલ સ્પર્શ કરવો નહીં અને તાત્કાલિક પોલીસને જાણ કરવી. પરિસ્થિતિની ગંભીરતાને જોતાં જો જરૂર જણાય તો વિદ્યાર્થીઓને સુરક્ષિત રીતે ઘરે મોકલી દેવાની પણ છૂટ આપવામાં આવી છે.