Ahmedabad ની દીવાન બલ્લુભાઈ સ્કૂલને DEO ની નોટિસ, શિક્ષકોની હડતાળ વચ્ચે બાળકોને ગોંધી રાખતા ફટકારાયો દંડ

અમદાવાદના મણિનગર વિસ્તારમાં આવેલી દીવાન બલ્લુભાઈ સ્કૂલને જિલ્લા શિક્ષણ અધિકારી (DEO) દ્વારા નોટિસ ફટકારવામાં આવી છે અને રૂપિયા 10 હજારનો દંડ કરવામાં આવ્યો છે. આ કાર્યવાહી શિક્ષકોની હડતાળ દરમિયાન બાળકોને શાળામાં ગોંધી રાખવાની ગંભીર ઘટનાને પગલે કરવામાં આવી છે. શાળાના આ બેદરકારીભર્યા કૃત્યથી વાલીઓમાં ભારે રોષ ફેલાયો હતો. DEO દ્વારા કરવામાં આવેલી તપાસમાં જાણવા મળ્યું કે, શાળા તંત્રએ આ સમગ્ર ઘટના અંગે શિક્ષણ વિભાગને જાણ કરી નહોતી જે નિયમોનું સ્પષ્ટ ઉલ્લંઘન છે.

શિક્ષકોએ હડતાળ પાડી

આ ઘટના ત્યારે બની જ્યારે શાળાના શિક્ષકોએ તેમના પગાર અને અન્ય મુદ્દાઓ અંગે હડતાળ પડી હતી. આ હડતાળને કારણે શાળામાં શિક્ષણકાર્ય ખોરવાયું હતું. પરંતુ, આ પરિસ્થિતિમાં શાળાના સંચાલકોએ બાળકોને સમયસર ઘરે મોકલવાને બદલે તેમને શાળામાં જ રોકી રાખ્યા હતા, જેના કારણે વાલીઓમાં ચિંતાનું વાતાવરણ સર્જાયું હતું. DEO ને આ ઘટનાનો જાણ થતાં તાત્કાલિક તપાસના આદેશ આપવામાં આવ્યા હતા. પ્રાથમિક તપાસમાં શાળાની બેદરકારી સ્પષ્ટ થતાં DEO એ નોટિસ ફટકારી દંડની કાર્યવાહી કરી છે.

શિક્ષણ વિભાગ દ્વારા શાળાને નિર્દેશો આપ્યા

શિક્ષણ વિભાગ દ્વારા શાળાને સ્પષ્ટ નિર્દેશો આપવામાં આવ્યા છે કે, ભવિષ્યમાં આવી ઘટનાઓનું પુનરાવર્તન ન થાય. DEO એ જણાવ્યું હતું કે, બાળકોની સુરક્ષા અને સુવિધા એ શાળાની પ્રાથમિક જવાબદારી છે અને આ જવાબદારી નિભાવવામાં નિષ્ફળ રહેલી કોઈપણ શાળા સામે કડક કાર્યવાહી કરવામાં આવશે. રૂપિયા 10 હજારનો દંડ એ માત્ર પ્રતીકાત્મક કાર્યવાહી છે, પરંતુ તેનો હેતુ તમામ શાળાઓને ગંભીરતા સમજાવવાનો છે. આ ઘટનાએ ફરી એકવાર શાળાઓના સંચાલન અને બાળકોની સુરક્ષાના મુદ્દાઓ પર ગંભીર સવાલો ઉભા કર્યા છે.