અમદાવાદ જિલ્લાના ધોળકા શહેરમાંથી શિક્ષણ જગતને કલંકિત કરતો એક શરમજનક કિસ્સો સામે આવ્યો છે, જ્યાં સરકારી કુમાર શાળાના જ એક શિક્ષકે પવિત્ર ગણાતા ગુરુ-શિષ્યના સંબંધને લાંછન લગાવ્યું છે. શાળામાં ધોરણ 8માં અભ્યાસ કરતા અને માત્ર 13 વર્ષની કુમળી વય ધરાવતા એક સગીર વિદ્યાર્થી સાથે શિક્ષકે સરેઆમ શારીરિક અડપલા અને દુર્વ્યવહાર કર્યો હોવાની ઘટના પ્રકાશમાં આવી છે. આ ઘટનાને પગલે ધોળકા પંથકના વાલીઓ અને સ્થાનિક રહીશોમાં ભારે આક્રોશ અને ચિંતાની લાગણી વ્યાપી ગઈ છે.
ડરી ગયેલા સગીરે પરિવારને આપવીતી જણાવી
નરાધમ શિક્ષક દ્વારા કરાયેલા આ અમાનવીય અને અજુગતા શારીરિક વ્યવહારથી સગીર વિદ્યાર્થી ખૂબ જ ભયભીત થઈ ગયો હતો. શરૂઆતમાં ડરી ગયેલા આ બાળકે અંતે હિંમત ભેગી કરીને પોતાના પરિવારના સભ્યોને શાળામાં શિક્ષક દ્વારા આચરવામાં આવેલી કાળી કરતૂત વિશે રડતા-રડતા વિગતવાર આપવીતી જણાવી હતી. બાળક પર થયેલા આ શારીરિક અત્યાચારની વાત સાંભળતા જ પરિવારના પગ નીચેથી જમીન સરકી ગઈ હતી અને તેઓ તાત્કાલિક ન્યાય મેળવવા માટે ધોળકા પોલીસ સ્ટેશન પહોંચ્યા હતા.
