અંતરરાષ્ટ્રીય માર્ગે થતી નશીલા પદાર્થોની તસ્કરી સામે અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર કસ્ટમ્સ વિભાગની એર ઈન્ટેલિજન્સ યુનિટ (AIU) એ મોટી સફળતા મેળવી છે. બેંગકોકથી અમદાવાદ આવી પહોંચેલી ફ્લાઇટના એક મુસાફર પર શંકા જતાં કસ્ટમ્સની ટીમે તેને અટકાવીને તેના સામાનની બારીકાઈથી તલાશી લીધી હતી. તલાશી દરમિયાન મુસાફરના ચેક-ઇન બેગેજમાંથી રૂ. કરોડોની કિંમતનો ૮.૯૧૩ કિલોગ્રામ ગેરકાયદેસર ગાંજો મળી આવ્યો હતો.
બેંગકોકની ફ્લાઇટમાંથી આવેલ પેસેન્જર પાસેથી ગાંજો જપ્ત
તસ્કર દ્વારા ડ્રગ્સ છુપાવવા માટે અનોખી મોડસ ઓપરેન્ડી અપનાવવામાં આવી હતી. તેણે ટ્રોલી બેગમાં કપડાંની વચ્ચે ખાસ તૈયાર કરાયેલા ૧૪ એરટાઇટ (વિશેષ પ્લાસ્ટિક પેકિંગ) પેકેટોમાં આ ગાંજાનો જથ્થો છુપાવ્યો હતો, જેથી એરપોર્ટ પર સ્કેનિંગ કે ગંધ દ્વારા તે પકડાઈ ન જાય. પરંતુ એર ઈન્ટેલિજન્સ યુનિટની સજાગતા અને ચોક્કસ બાતમીના આધારે આ સમગ્ર કૌભાંડનો પર્દાફાશ થયો છે.