ગુજરાતમાં ચોમાસાના વિધિવત પ્રારંભની સાથે જ અમદાવાદ મ્યુનિસિપલ કોર્પોરેશનની પ્રી મોન્સૂન કામગીરીના ધજાગરા ઉડી ગયા છે.સીઝનના પહેલા જ સામાન્ય વરસાદમાં શહેરના અનેક વિસ્તારોમાં પાણી ભરાઈ જવાની અને રસ્તાઓ ધોવાઈ જવાની વ્યાપક ઘટનાઓ સામે આવ્યા બાદ આખરે કુંભકર્ણ નિદ્રામાં પોઢેલું AMC તંત્ર જાગ્યું છે.વહીવટી તંત્રને હવે બ્રહ્મજ્ઞાન લાધ્યું હોય તેમ ઉતાવળે નવા નિયમો જાહેર કરવામાં આવ્યા છે.
શહેરના તમામ ઝોન અને વિભાગોને કડક સૂચના
AMCના ઉચ્ચ સત્તાધીશો દ્વારા તાકીદની બેઠક યોજીને શહેરના તમામ ઝોન અને વિભાગોને કડક સૂચના આપવામાં આવી છે કે હવે ચોમાસાની આખી સીઝન દરમિયાન શહેરમાં ક્યાંય પણ નવા ખાડા ખોદવા નહીં.ગેસ લાઇન, ડ્રેનેજ, કેબલ કે અન્ય કોઈપણ કામગીરી માટે રસ્તાનું ખોદકામ કરવા પર તાત્કાલિક અસરથી પ્રતિબંધ મૂકી દેવામાં આવ્યો છે.
