અમદાવાદ શહેરમાં નાગરિકોના આરોગ્ય સાથે ચેડાં કરતા વેપારીઓ સામે અમદાવાદ મ્યુનિસિપાલ કોર્પોરેશનના ફૂડ વિભાગ દ્વારા લાલ આંખ કરવામાં આવી છે. તહેવારો અને સામાન્ય દિવસોમાં પણ શુદ્ધ અને ગુણવત્તાસભર ખાદ્ય સામગ્રી મળી રહે તે હેતુસર AMC ની ટીમો દ્વારા શહેરના વિવિધ વિસ્તારોમાં અચાનક ચેકિંગ હાથ ધરવામાં આવ્યું હતું. આ દરમિયાન ખાસ કરીને અખાદ્ય તેલનો વપરાશ અને ભારે ગંદકી ફેલાવતા એકમો સામે કડક કાર્યવાહી કરવામાં આવી છે.
4 કુખ્યાત ખાદ્ય એકમોને ફટકારવામાં આવ્યું સીલ
AMC ના ફૂડ વિભાગ દ્વારા કરવામાં આવેલી આ ઝુંબેશ દરમિયાન ગંદકી અને નિયમોના ભંગ બદલ કુલ 4 મુખ્ય ખાદ્ય એકમોને ટાંચ મારીને સીલ કરી દેવામાં આવ્યા છે.
- શ્યામ સુંદર ફૂડ પ્રોડક્ટ (દૂધેશ્વર)
- સ્વસ્તિક ફૂડ (શાહીબાગ)
- પ્રતાપ કનૈયા લાલ (ગાંધી રોડ)
- અમરતલાલ નમકીન વાલા (ગાંધી રોડ)
અખાદ્ય તેલનો વપરાશ અને ગંદકીનો પર્દાફાશ
તપાસ દરમિયાન આ તમામ એકમોમાં અત્યંત દયનીય અને અસ્વચ્છ પરિસ્થિતિ (હાઈજેનિક કન્ડિશનનો અભાવ) જોવા મળી હતી. એટલું જ નહીં, ગ્રાહકોના સ્વાસ્થ્ય માટે હાનિકારક એવું અખાદ્ય તેલ (વાસી અને રિસાયકલ ઓઈલ) ખાવામાં વપરાતું હોવાનો પણ ખુલાસો થયો હતો. તંત્ર દ્વારા આ ગંભીર બેદરકારીને ધ્યાનમાં રાખીને તાત્કાલિક ધોરણે તમામ ચારેય એકમોને સીલ કરવાની કડક કાર્યવાહી કરવામાં આવી છે, જેને કારણે વેપારી આલમમાં ભારે ખળભળાટ મચી ગયો છે.
આ પણ વાંચો: Ahmedabadમાં ડ્રેનેજ સમસ્યાના કાયમી ઉકેલ તરફ AMCનું મહત્વપૂર્ણ પગલું: અંદાજે 2.25 લાખ નાગરિકોને મળશે રાહત
