અમદાવાદ શહેરના ચાંદખેડા વિસ્તારમાં જગતપુર ખાતે આવેલી 'સેરેનીટી સ્પેસ સોસાયટી'માં ઘરઘાટી દ્વારા જ માલિકના ઘરમાં મોટી ચોરી આચરવામાં આવી હોવાની ઘટના સામે આવી છે. સોસાયટીમાં રહેતા યતીન મેવાડાના ઘરમાં ઘરકામ માટે રાખવામાં આવેલા સુનિલ લીલારામ કલાસવા નામના શખ્સે માલિકની ગેરહાજરીનો લાભ ઉઠાવી કબાટ તોડી નાખ્યું હતું.
ચાંદખેડાના જગતપુરમાં ફ્લેટમાંથી ઘરઘાટી ચોરી કરી ફરાર
સુનિલે કબાટના લોકરમાં રાખેલી રોકડ રકમ તેમજ રૂ. 15.30 લાખની કિંમતના સોનાના દાગીના અને રૂ. 5.20 લાખની કિંમતના ચાંદીના દાગીના પર હાથફેરો કર્યો હતો. ફરિયાદ મુજબ ચોરાયેલા કુલ મુદ્દામાલની કિંમત આશરે રૂ. 27.50 લાખ થવા જાય છે.આ ચોરીના કૌભાંડમાં સુનિલ લીલારામ કલાસવા સાથે તેના બનેવી રાજુનું નામ પણ સામે આવ્યું છે. ઘરમાલિકે તપાસ કરતાં સોસાયટીના CCTV ફૂટેજમાં સુનિલ અને તેનો બનેવી રાજુ હાથમાં થેલીઓ લઈને ફ્લેટમાંથી ઉતાવળે બહાર નીકળતા સ્પષ્ટપણે કેદ થયેલા મળી આવ્યા હતા.