અમદાવાદ શહેરમાં રખડતા ઢોરનો ત્રાસ દૂર કરવા અને નાગરિકોની સુરક્ષા માટે અમદાવાદ મ્યુનિસિપલ કોર્પોરેશન (AMC) ની ઢોર વિરોધી સ્ક્વોડ (CNCD) સતત વિવિધ વિસ્તારોમાં ઓપરેશન ચલાવી રહી છે. આ કડીમાં નગરપાલિકાની ટીમ રાણીપ વિસ્તારમાં રસ્તા પર અડચણરૂપ બનતા પશુઓને પકડવાની કાયદેસરની કામગીરી કરી રહી હતી. આ દરમિયાન કેટલાક સ્થાનિક માલિકો અને અસામાજિક તત્વોએ સરકારી ફરજમાં રૂકાવટ ઉભી કરી હતી. એક યુવતી અને અન્ય એક વ્યક્તિએ અચાનક આવીને કોર્પોરેશનના કર્મચારીઓ સાથે ઘર્ષણ શરૂ કરી દીધું હતું.
અપશબ્દો બોલી જાનથી મારી નાખવાની આપી ધમકી
ઢોર પકડવાની આ ઝુંબેશથી ઉશ્કેરાયેલી સ્થાનિક યુવતી અને તેની સાથે આવેલા શખ્સે કાયદાનો કોઈ પણ ડર રાખ્યા વિના AMC ના અધિકારીઓ તેમજ કર્મચારીઓ પર ભારે આક્રોશ ઠાલવ્યો હતો. આ તત્વોએ સરેઆમ સરકારી સ્ટાફને બિભત્સ અપશબ્દો (ગાળો) બોલવાનું શરૂ કર્યું હતું અને પશુઓને ડબ્બે પૂરતા અટકાવ્યા હતા. આટલેથી ન અટકતા, તેઓએ કર્મચારીઓને ગંભીર પરિણામો ભોગવવાની અને જાનથી મારી નાખવાની ખુલ્લી ધમકીઓ પણ આપી હતી. આ હંગામાને કારણે થોડીવાર માટે તણાવપૂર્ણ સ્થિતિ સર્જાઈ હતી અને તંત્રની કામગીરી ખોરવાઈ ગઈ હતી.
