મધ્યપ્રદેશ રાજ્યના અલીરાજપુર જિલ્લામાં આવેલા ચન્દ્રશેખર આઝાદનગર પોલીસ સ્ટેશન વિસ્તારમાં બનેલી મર્ડરની ગંભીર ઘટનામાં સંડોવાયેલો અને ત્યારથી જ ફરાર થયેલો આરોપી અમદાવાદમાં આશ્રય લઈ રહ્યો હોવાની બાતમી ક્રાઇમ બ્રાન્ચને મળી હતી. અમદાવાદ શહેર ક્રાઇમ બ્રાન્ચની ટીમ જ્યારે શહેરમાં ગુના આચરીને નાસતા ફરતા આરોપીઓની સરપ્રાઇઝ ચેકિંગ અને પેટ્રોલિંગમાં હતી, ત્યારે આ સફળતા સાંપડી હતી.
અમદાવાદ ક્રાઇમ બ્રાન્ચને મળી મોટી સફળતા
ચોક્કસ બાતમીના આધારે ક્રાઇમ બ્રાન્ચે અમદાવાદના મકરબા વિસ્તાર ખાતે વોચ ગોઠવીને મૂળ મધ્યપ્રદેશના અલીરાજપુર જિલ્લાના સેજાવાળા ગામના રહેવાસી ૨૭ વર્ષીય દિનેશ મદન માવીને દબોચી લીધો હતો. આરોપીની પ્રાથમિક પૂછપરછ અને તપાસ કરતા સામે આવ્યું હતું કે તેની સામે મધ્યપ્રદેશના ચન્દ્રશેખર આઝાદનગર પોલીસ સ્ટેશનમાં હત્યા (IPC/BNS ની કલમો હેઠળ) નો ગુનો દાખલ થયેલો છે અને તે ધરપકડથી બચવા માટે અમદાવાદ આવીને છુપાયો હતો.