ધુકા-ધોલેરા સ્ટેટ હાઇવે પર અકસ્માતોની શ્રેણી અટકવાનું નામ નથી લઈ રહી. આજે વધુ એક ભયાનક માર્ગ અકસ્માત રોજકા ગામ નજીક સર્જાયો હતો. મળતી વિગતો અનુસાર, એક પેસેન્જર/અંગત કાર પૂરઝડપે ધંધુકા-ધોલેરા માર્ગ પરથી પસાર થઈ રહી હતી. આ દરમિયાન રોજકા ગામની સીમ નજીક પહોંચતા જ અચાનક કારના ચાલકે વાહન પરથી કાબૂ ગુમાવી દીધો હતો, જેના કારણે કાર રસ્તાની સાઈડમાં ઉતરી ગઈ હતી અને ધડાકાભેર બે-ત્રણ પલટી મારી ગઈ હતી.
કાર બે-ત્રણ પલટી મારી ગઈ
કાર પલટી મારવાના કારણે અંદર બેસેલા મુસાફરો વચ્ચે ભારે બૂમાબૂમ અને ચીસાચીસ મચી ગઈ હતી. અકસ્માતના જોરદાર અવાજના કારણે આસપાસના ખેતરોમાં કામ કરતા લોકો અને રોજકા ગામના સ્થાનિક રહીશો તાત્કાલિક ઘટનાસ્થળે દોડી આવ્યા હતા. પલટી મારી ગયેલી કારની અંદર ફસાયેલા ૫ લોકોને ગ્રામજનોએ ભારે જહેમત બાદ એક પછી એક બહાર કાઢ્યા હતા.