દેશભરમાં ચર્ચાનો વિષય બનેલા અને યુવાનોમાં અત્યંત લોકપ્રિય ગાયક દિલજીત દોસાંજ (Diljit Dosanjh) ની મ્યુઝિક કોન્સર્ટ આગામી 21 નવેમ્બર (21st November) ના રોજ અમદાવાદના વિશ્વપ્રસિદ્ધ નરેન્દ્ર મોદી સ્ટેડિયમ (Narendra Modi Stadium) ખાતે યોજાવા જઈ રહી છે. આ 'રૂ પે ઓરા ઇન્ડિયા ટૂર' (Diljit Dosanjh Live Concert) પહેલાં જ જિલ્લા બાળ સુરક્ષા એકમ (DCPU - District Child Protection Unit) સક્રિય થઈ ગયું છે. DCPU દ્વારા બાળકોના હિત અને સુરક્ષાને સર્વોપરી રાખીને અમદાવાદ પોલીસ કમિશનરને સત્તાવાર રીતે ગંભીર રજૂઆત કરવામાં આવી છે, જેને કારણે આયોજકોની મુશ્કેલીઓ વધી શકે છે.

ગીતોમાં દારૂ-ડ્રગ્સના પ્રચાર અને બાળકોની એન્ટ્રી સામે સવાલ

DCPU દ્વારા કરવામાં આવેલી રજૂઆતમાં મુખ્યત્વે કોન્સર્ટ દરમિયાન બાળકોની ઉપસ્થિતિ અને પ્રસ્તુત થનારા ગીતોના શબ્દો પર સવાલો ઉઠાવવામાં આવ્યા છે. આ શો દરમિયાન ગીતોમાં દારૂ, ડ્રગ્સ અને હિંસાને પ્રોત્સાહન કે પ્રચાર કરવામાં આવતો હોય તો તેની સામે કડક કાર્યવાહી કરવાની માંગ કરવામાં આવી છે. આ ઉપરાંત, કોન્સર્ટમાં નાના બાળકોની એન્ટ્રી પર રોક લગાવવા તથા સ્ટેજ પર બાળકોને બોલાવવાની પ્રથા સામે પણ સ્પષ્ટ વાંધો લેવાયો છે. ખાસ કરીને સ્ટેજ પર પ્રદર્શન દરમિયાન બુલેટ બેલ્ટ અને હથિયારોના પ્રતીક સમાન પ્રોપ્સ (Props representing weapons) ના ઉપયોગ સામે પણ તંત્રનું ધ્યાન દોરવામાં આવ્યું છે.

120 ડેસિબલથી વધુ અવાજ અને સ્ટ્રોબ લાઇટ્સથી બાળકોના સ્વાસ્થ્યને ગંભીર જોખમ

કોન્સર્ટમાં મોટા અવાજના સ્પીકર્સ અને વિઝ્યુઅલ ઇફેક્ટ્સના કારણે બાળકોના સ્વાસ્થ્ય પર થનારી વિપરીત અસરો અંગે પણ ગંભીર ચિંતા વ્યક્ત કરવામાં આવી છે. કોન્સર્ટ દરમિયાન 120 ડેસિબલ (120 Decibels) કરતાં પણ વધુ તીવ્રતાવાળો અવાજ, ભારે ફ્લેશિંગ લાઇટ્સ અને સ્ટ્રોબ લાઇટ્સ (Stroboscopic Lights) નો ઉપયોગ થતો હોય છે, જે નાના બાળકોની શ્રવણ શક્તિ અને માનસિક સ્વાસ્થ્ય માટે જોખમી સાબિત થઈ શકે છે. આ તમામ બાબતોને ધ્યાનમાં રાખીને પોલીસ પ્રશાસન દ્વારા આયોજકો સામે યોગ્ય નિયંત્રણો અને માર્ગદર્શિકા જારી કરવામાં આવે તેવી પ્રબળ માંગ કરવામાં આવી છે.

આ પણ વાંચો : Rajkotમાં પ્રાઈવેટ થિયેટરની આડમાં દારૂની મહેફિલ! સોશિયલ મીડિયા પર વાયરલ થયેલા વીડિયોએ મચાવી ખળભળાટ