અમદાવાદના નરેન્દ્ર મોદી સ્ટેડિયમમાં આગામી 21 નવેમ્બરે યોજાનારા દિલજીત દોસાંજના મ્યુઝિક કોન્સર્ટ માટે તંત્રની સત્તાવાર મંજૂરી વિના જ ઓનલાઇન ટિકિટોનું વેચાણ શરૂ કરી દેવાયું છે. તંત્ર દ્વારા હજુ એનઓસી આપવામાં આવી નથી. મંજૂરીની સ્થિતિ અસ્પષ્ટ હોવા છતાં મોટી સંખ્યામાં ચાહકો ટિકિટ ખરીદી રહ્યા હોવાથી કાર્યક્રમ સામે ગંભીર સવાલો ઊભા થયા છે.
દિલજીત દોસાંજના લાઈવ કોન્સર્ટમાં હજારો સંગીતપ્રેમીઓ પહોંચશે
અમદાવાદ શહેરમાં આગામી સમયમાં યોજાનારા મોટા મનોરંજન કાર્યક્રમ અંગે વહીવટી તંત્ર તરફથી જરૂરી પરવાનગી મળે તે પહેલાં જ ટિકિટોનું વેચાણ ધૂમધામથી શરૂ થઈ ગયું છે. અમદાવાદના વિશ્વપ્રસિદ્ધ નરેન્દ્ર મોદી સ્ટેડિયમ ખાતે 21 નવેમ્બરના દિવસે યોજાનારા ગાયક દિલજીત દોસાંજના આ લાઈવ કોન્સર્ટમાં હજારોની સંખ્યામાં સંગીતપ્રેમીઓ પહોંચવાની ધારણા છે.
આયોજકોએ તંત્ર પાસેથી સત્તાવાર મંજૂરી જ લીધી નથી
જોકે આયોજકો દ્વારા સ્થાનિક પોલીસ કે વહીવટી તંત્ર પાસેથી કોઈપણ પ્રકારની સત્તાવાર મંજૂરી અગાઉથી લેવામાં આવી નથી. સરકારી અને સ્થાનિક તંત્રના કડક સુરક્ષા નિયમો તેમજ લાંબી મંજૂરી પ્રક્રિયા વચ્ચે આ કોન્સર્ટને નિયત સમયે એનઓસી મળશે કે કેમ તે અંગે ભારે અનિશ્ચિતતા પ્રવર્તી રહી છે.
નિયમો નેવે મૂકી ટિકીટોનું ધૂમ વેચાણ
સામાન્ય રીતે આવા મોટા જાહેર કાર્યક્રમો માટે તમામ સરકારી પરવાનગીઓ મેળવ્યા બાદ જ ટિકિટ બુકિંગ વિન્ડો ખોલવામાં આવતી હોય છે. પરંતુ અહીં તમામ નિયમો નેવે મૂકીને ઓનલાઇન પ્લેટફોર્મ પર ટિકિટોનું ધૂમ વેચાણ ખુલ્લું મૂકી દેવાતાં આશ્ચર્ય ફેલાયું છે.
ટિકિટ ખરીદનારા હજારો નિર્દોષ ચાહકોના નાણાંનું શું થશે
આ સંજોગોમાં જો વહીવટી તંત્ર દ્વારા આખરી સમયે મંજૂરી આપવાનો સ્પષ્ટ ઇનકાર કરવામાં આવે અથવા તો કોઈ અનિવાર્ય કારણોસર આ કાર્યક્રમ રદ જાહેર થાય, તો ટિકિટ ખરીદનારા હજારો નિર્દોષ ચાહકોના નાણાંનું શું થશે તે સૌથી મોટો સવાલ બન્યો છે. ચાહકો પાસેથી વસૂલવામાં આવેલા આ નાણાં સમયસર કોણ પરત આપશે અને તેના રિફંડની ચોક્કસ નીતિ શું રહેશે તે અંગે આયોજક મંડળ દ્વારા હજુ સુધી કોઈ સ્પષ્ટતા કરવામાં આવી નથી.

ટિકિટોનું વેચાણ કરવાની ઉતાવળ કેમ
આ ઉપરાંત એનઓસી મેળવવાની પ્રક્રિયા પૂર્ણ કર્યા વગર ટિકિટોનું વેચાણ કરવાની આવી અણધારી ઉતાવળ શા માટે કરવામાં આવી તે બાબતે પણ ગંભીર શંકાઓ પેદા થઈ રહી છે. મોટી સંખ્યામાં ચાહકો પોતાના પ્રિય કલાકારને સાંભળવા માટે ઉત્સાહપૂર્વક મોંઘી ટિકિટો બુક કરાવી રહ્યા છે, પરંતુ તેમને એ વાતની સહેજ પણ જાણ નથી કે આ કાર્યક્રમ કાયદેસરની મંજૂરીના અભાવે અનિશ્ચિતતાના વંટોળમાં અટવાયેલો છે. આથી ટિકિટ ખરીદનારા તમામ લોકો માથે ભારે આર્થિક જોખમ તોળાઈ રહ્યું છે.
ચાહકોની જંગી ભીડની સુરક્ષાની અંતિમ જવાબદારી કોની રહેશે
બીજી તરફ આ કાર્યક્રમ સાથે સુરક્ષા વ્યવસ્થાના અત્યંત સંવેદનશીલ મુદ્દાઓ પણ જોડાયેલા છે. તાજેતરમાં સામે આવેલી બોમ્બ થ્રેટની ધમકીઓની પૃષ્ઠભૂમિ વચ્ચે સ્ટેડિયમમાં એકત્ર થનારી હજારો ચાહકોની જંગી ભીડની સુરક્ષાની અંતિમ જવાબદારી કોની રહેશે તે સૌથી મોટો પ્રશ્ન છે. આટલી વિશાળ જનમેદની વચ્ચે કોઈ અણધારી આપત્તિ સર્જાય તો સ્ટેડિયમમાં ઇમરજન્સી એક્ઝિટની વ્યવસ્થા, ભીડ નિયંત્રણ અને કટોકટી વ્યવસ્થાપન અંગે તંત્ર તેમજ આયોજકોની પૂર્વતૈયારી કેટલી છે તે બાબતે કોઈ સત્તાવાર રોડમેપ જાહેર થયો નથી.
સામાન્ય નાગરિકોની સુરક્ષાનું શું
કોન્સર્ટની ભવ્યતા કે આયોજકોના આર્થિક નફા કરતાં પણ સામાન્ય નાગરિકોના જીવ અને જાહેર સુરક્ષા સર્વોપરી ગણાય છે. તેથી સરકારી મંજૂરી વિના આટલા મોટા પાયે આયોજનને આગળ ધપાવવાનો નિર્ણય કેટલો યોગ્ય છે તે બાબતે ભારે નારાજગી જોવા મળી રહી છે. હાલ તો સમગ્ર વિવાદને પગલે અમદાવાદ વહીવટી તંત્રની આગામી કડક કાર્યવાહી અને આયોજકો તરફથી આવનારા સત્તાવાર ખુલાસા પર સૌ કોઈની નજર ટકેલી છે.
આ પણ વાંચો : Delhi Policeનું સુપ્રીમમાં સોગંદનામું, પત્રકારોને કામ કરતા રોક્યા નથી, રીલ બનાવનારાઓને કાયદામાંથી મુક્તિ નહીં