અમદાવાદના ઘાટલોડિયા વિસ્તારમાં આવેલા તળાવમાં છેલ્લા ઘણા સમયથી ડ્રેનેજના ગંદા પાણી ભરાઈ રહ્યા છે, જેના કારણે આસપાસના રહીશો ભારે મુશ્કેલીનો સામનો કરી રહ્યા છે. તળાવમાં ડ્રેનેજનું દૂષિત પાણી સતત ઠલવાતા આખા પંથકમાં અસહ્ય દુર્ગંધ ફેલાઈ ગઈ છે. આ ગંદકીના કારણે મચ્છરોનો ઉપદ્રવ પણ ચિંતાજનક હદે વધી ગયો છે, જેનાથી સ્થાનિક લોકોમાં ડેંગ્યુ, મલેરિયા જેવા રોગચાળો ફેલાવાનો ભારે ભય વ્યાપી ગયો છે.
દોઢ વર્ષથી સમસ્યા હોવા છતાં તંત્રની ઉદાસીનતા
સ્થાનિકોના જણાવ્યા મુજબ, ઘાટલોડિયા તળાવમાં ડ્રેનેજના પાણી ભરાવાની આ ગંભીર સમસ્યા છેલ્લા દોઢ વર્ષથી સતત બની રહી છે. આ અંગે મહાનગરપાલિકાના જવાબદાર અધિકારીઓને અનેકવાર રજૂઆતો કરવા છતાં તંત્ર દ્વારા આ બાબતે કોઈ નક્કર પગલાં ભરવામાં આવ્યા નથી. તંત્રની આ નિષ્ક્રિયતા અને ઉદાસીન નીતિને કારણે વિસ્તારના લોકોમાં ભારે રોષ જોવા મળી રહ્યો છે.