ગુજરાતમાં નવજાત શિશુઓથી લઈને કિશોર વયના બાળકોના સ્વાસ્થ્યને લઈને બે અત્યંત ચિંતાજનક બાબતો સામે આવી છે. એક તરફ મોબાઈલ અને સોશિયલ મીડિયાના વધુ પડતા ઉપયોગને કારણે બાળકોમાં માનસિક સમસ્યાઓ ઝડપથી વધી રહી છે, તો બીજી તરફ અધૂરા મહિને જન્મેલા અને ઓછું વજન ધરાવતા નવજાત બાળકોમાં આંખની ગંભીર બીમારીનું જોખમ વધી રહ્યું છે. આ બંને પરિસ્થિતિઓ વાલીઓ અને આરોગ્ય તંત્ર માટે ગંભીર ચિંતાનો વિષય બની છે.
મોબાઈલના વધુ ઉપયોગથી માનસિક સમસ્યાઓ વધી
રાજ્યમાં બાળકોમાં માનસિક સમસ્યાઓના કેસોમાં મોટો વધારો નોંધાયો છે. મોબાઈલ ફોનના વધુ પડતા ઉપયોગથી બાળકો પર ગંભીર માનસિક અસર થઈ રહી છે, જેના પરિણામે ગુજરાતમાં દરરોજ 250 બાળકોને માનસિક સારવારની જરૂર પડી રહી છે. સોશિયલ મીડિયાના દુરુપયોગથી બાળકોની મુશ્કેલીઓમાં સતત વધારો થયો છે. સ્ક્રીન ટાઈમ વધવાને કારણે બાળકોનો પોતાના પરિવાર સાથેનો સંવાદ ઘટી ગયો છે, જેના લીધે બાળકોમાં ડિપ્રેશન અને ચિંતાનું પ્રમાણ ઝડપથી વધી રહ્યું છે.
