ગુજરાતમાં શિયાળાની ઋતુ ધીમે-ધીમે જમાવટ કરી રહી છે, ત્યારે રાજ્યના હવામાન વિભાગ દ્વારા આગામી દિવસોના હવામાનને લઈને મહત્વપૂર્ણ આગાહી કરવામાં આવી છે. હવામાન વિભાગના અનુમાન મુજબ, રાજ્યમાં આગામી બે દિવસ માટે ઠંડીનો ચમકારો યથાવત રહેશે. ખાસ કરીને વહેલી સવારે અને મોડી રાત્રે ઠંડા પવનોને કારણે લોકોને ઠંડકનો અનુભવ થશે.

ઉત્તર-પૂર્વના પવનો ફૂંકાતા લઘુતમ તાપમાનમાં 2 થી 4 ડિગ્રીની વધઘટ રહેશે

હવામાન વિભાગે જણાવ્યું છે કે, હાલ રાજ્ય પર ઉત્તર-પૂર્વ દિશાના પવનો ફૂંકાઈ રહ્યા છે, જેના પરિણામે વાતાવરણમાં ઠંડક પ્રસરી છે. આ પવનોની અસર હેઠળ આગામી દિવસોમાં રાજ્યના વિવિધ ભાગોમાં લઘુતમ તાપમાનમાં 2 થી 4 ડિગ્રી સુધીની વધઘટ જોવા મળી શકે છે.

અમદાવાદ-ગાંધીનગરમાં મહત્તમ તાપમાન 32 ડિગ્રી અને લઘુતમ 15 થી 16 ડિગ્રી રહેશે

રાજ્યના મુખ્ય શહેરોના તાપમાનની વાત કરીએ તો, અમદાવાદ અને ગાંધીનગર સહિતના વિસ્તારોમાં લઘુતમ તાપમાન 15 થી 16 ડિગ્રી આસપાસ રહેવાની શક્યતા છે. જ્યારે બપોરના સમયે મહત્તમ તાપમાન 32 ડિગ્રી સુધી રહેવાનું અનુમાન છે. આમ, રાજ્યમાં હાલ બેવડી ઋતુનો અહેસાસ થઈ રહ્યો છે, જ્યાં દિવસ દરમિયાન સામાન્ય ગરમી અને રાત્રિના સમયે ગુલાબી ઠંડીનો ચમકારો અનુભવાઈ રહ્યો છે.

આ પણ વાંચો: Surat: પાંડેસરા સ્થિત રાજ ઇન્ડસ્ટ્રીયલ એસ્ટેટમાં ભીષણ આગ ભભૂકી; ફાયર વિભાગની 8 ગાડીઓએ કાબૂ મેળવ્યો