ગુજરાત રાજ્યમાં ચોમાસાનો માહોલ જામ્યો છે, ત્યારે હવામાન વિભાગ દ્વારા વધુ એક વેધર બુલેટિન જાહેર કરવામાં આવ્યું છે. હવામાન વિભાગની લેટેસ્ટ આગાહી મુજબ, આજે રાત્રે 11 વાગ્યા સુધી રાજ્યના અનેક જિલ્લાઓમાં વાતાવરણમાં અચાનક પલટો આવશે. આ સમયગાળા દરમિયાન 41 થી 61 કિમી પ્રતિ કલાકની ઝડપે ભારે પવન ફૂંકાવાની અને ગાજવીજ સાથે ધોધમાર વરસાદ તૂટી પડવાની પ્રબળ સંભાવના છે, જેને લઈને તંત્રએ સત્તાવાર એલર્ટ જાહેર કર્યું છે.
આ મહાનગરો અને મધ્ય-દક્ષિણ ગુજરાતમાં ભારે વરસાદની શક્યતા
હવામાન વિભાગની આ આગાહીમાં રાજ્યના મોટા શહેરો પણ બાકાત નથી. અમદાવાદ, વડોદરા અને સુરત જેવા મહાનગરોમાં પણ ભારે પવન સાથે વરસાદની ચેતવણી આપવામાં આવી છે. આ ઉપરાંત મધ્ય અને દક્ષિણ ગુજરાતના ખેડા, આણંદ, પંચમહાલ, ભરૂચ, નવસારી, ડાંગ, નર્મદા અને તાપીમાં પણ મેઘરાજા રૌદ્ર સ્વરૂપ ધારણ કરી શકે છે. વલસાડ, છોટાઉદેપુર, દમણ અને દાદરા નગર હવેલીમાં પણ વરસાદી માહોલ છવાયેલો રહેવાની આગાહી કરાઈ છે.
