અમદાવાદ શહેરમાં ગેરકાયદે પ્રવૃત્તિઓ સામે સ્ટેટ મોનિટરિંગ સેલ ભારે એક્શન મોડમાં જોવા મળી રહ્યું છે. તાજેતરમાં SMCની ટીમે નરોડા GIDC વિસ્તારમાં રેડ કરીને વિદેશી દારૂનું મોટા પાયે થઈ રહેલું કટિંગ ઝડપી પાડ્યું હતું. સ્ટેટ મોનિટરિંગ સેલની આ સફળ રેડને કારણે સ્થાનિક નરોડા પોલીસની કામગીરી અને ચોકીય વિજીલન્સ સામે ગંભીર સવાલો ઊભા થયા છે. બૂટલેગરો બેફામ બની દારૂનું કટિંગ કરતા હતા અને સ્થાનિક પોલીસ ઊંઘતી ઝડપાઈ હોવાની ચર્ચા પોલીસ બેડામાં જોરશોરથી ચાલી રહી છે.
બીજા જ દિવસે સીપીનો સિંગલ ઓર્ડર, નરોડા PI સી. વી. નાયકની તાકિદે બદલી
નરોડા GIDCમાં દારૂનું કટિંગ ઝડપાયાના ચોવીસ કલાકની અંદર જ અમદાવાદ પોલીસ કમિશનરે કડક વલણ અપનાવ્યું છે. પોલીસ કમિશનરે એક સિંગલ ઓર્ડર કરીને વહીવટી કારણોસર નરોડા PI સી. વી. નાયકની તાત્કાલિક અસરથી ડિટેન્શન સેન્ટરમાં બદલી કરી દીધી છે. જ્યારે તેમની જગ્યાએ ડિટેન્શન સેન્ટરમાં ફરજ બજાવતા બી. એમ. કાતરીયાને નરોડા પોલીસ સ્ટેશનના નવા PI તરીકે મૂકવામાં આવ્યા છે. દારૂનો જથ્થો પકડાતાની સાથે જ PIની તકિદે બદલી કરવામાં આવતા અન્ય પોલીસ અધિકારીઓમાં પણ ફાચક પેસી ગયો છે. આ બદલી વહીવટી કારણોસર કરવામાં આવી હોવાનો ઉલ્લેખ કરવામાં આવ્યો છે.
છેલ્લા 15 દિવસથી અમદાવાદમાં SMCની તાબડતોબ કાર્યવાહી
અમદાવાદ શહેરમાં છેલ્લા 15 દિવસથી સ્ટેટ મોનિટરિંગ સેલ દ્વારા એક બાદ એક કડક સપાટો બોલાવવામાં આવી રહ્યો છે. અમદાવાદ શહેરમાં ચાલતા વિદેશી દારૂ, જુગારના ધામ તેમજ સ્પા સેન્ટરો સહિતની તમામ પ્રકારની અનિચ્છનીય અને ગેરકાયદે પ્રવૃત્તિઓ પર SMCની ટીમો સતત રેડ કરી રહી છે. સ્ટેટ મોનિટરિંગ સેલની આક્રમક કામગીરીને કારણે અસામાજિક તત્વોમાં ભારે ભયનો માહોલ સર્જાયો છે, તો બીજી તરફ સ્થાનિક પોલીસ સ્ટેશનોની નિષ્ક્રિયતા પણ ખુલ્લી પડી રહી છે.
રાજ્ય પોલીસ વડા જી. એસ. મલિકની સીધી દેખરેખ હેઠળ એક્શન પ્લાન
ઉલ્લેખનીય છે કે, SMCની આ તમામ કાર્યવાહી રાજ્ય પોલીસ વડા જી. એસ. મલિકની સીધી દેખરેખ હેઠળ ચાલી રહી છે. જી. એસ. મલિક અગાઉ અમદાવાદ શહેરના પોલીસ કમિશનર તરીકે ફરજ બજાવી ચૂક્યા હોવાથી તેઓ અમદાવાદની તમામ ગેરકાયદે પ્રવૃત્તિઓ અને બૂટલેગરોની મોડસ ઓપરેન્ડીથી ખૂબ સારી રીતે વાકેફ છે. અમદાવાદની આંતરિક બાબતોથી માહિતગાર હોવાને કારણે તેમણે SMCને વધુ પાવરફુલ બનાવીને એક્ટિવ કરી હોવાનું ચર્ચાઈ રહ્યું છે. SMC ની આ સતત કાર્યવાહી અને નરોડા PI ની બદલીથી સમગ્ર પોલીસ વિભાગમાં મોટો ખળભળાટ મચી ગયો છે.
આ પણ વાંચો : Mehsana News : લાંચિયા પોલીસ કર્મચારી સામે કોર્ટની કડક લાલ આંખ, વિસનગર સેશન્સ કોર્ટે ફટકારી 4 વર્ષની કેદ
