અમદાવાદ શહેરમાં અગાઉ પકડાયેલા અધધ રૂ. 25.64 કરોડના જંગી ડ્રગ્સ કેસ માં ક્રાઈમ બ્રાંચ દ્વારા તપાસનો ધમધમાટ વધારવામાં આવ્યો છે. આ ડ્રગ્સ પ્રકરણની સઘન તપાસ દરમિયાન એક પછી એક ચોંકાવનારા રહસ્યો બહાર આવી રહ્યા છે. પોલીસ તપાસમાં ખુલાસો થયો છે કે આ ડ્રગ્સનો જથ્થો કોઈ સામાન્ય રસ્તે નહીં પરંતુ દેશના ત્રણ સંવેદનશીલ સરહદી વિસ્તારોમાંથી સપ્લાય કરવામાં આવતો હતો. સુરક્ષા એજન્સીઓની નજરથી બચવા માટે આ ડ્રગ્સ માફિયાઓએ અપનાવેલી મોડસ ઓપરેન્ડી જોઈને તપાસ અધિકારીઓ પણ ચોંકી ઉઠ્યા છે.
હવાલાથી નાણાં વિદેશ મોકલાતા અને નવા સપ્લાયરોના નામ ખુલ્યા
તપાસમાં સામે આવ્યું છે કે આરોપીઓ દ્વારા સરહદ પારથી ગેરકાયદે માલ મોકલવા માટે આધુનિક ડ્રોન (Drone) ટેક્નોલોજી નો ઉપયોગ કરવામાં આવતો હતો. ડ્રોન દ્વારા આંતરરાષ્ટ્રીય કે રાજ્યની સરહદથી અંદર ત્રણ કિલોમીટર સુધી ડ્રગ્સની હેરાફેરી અને ડિલિવરી કરવામાં આવતી હતી. આટલું જ નહીં, પરંતુ ડ્રગ્સના વેચાણથી મળતી કરોડો રૂપિયાની માતબર રકમ હવાલા માધ્યમથી વિદેશમાં મોકલી આપવામાં આવતી હતી. ગુજરાતની યુવાધન બરબાદ કરવા માટે આ સપ્લાયરો રાજ્યમાં પાકું નેટવર્ક ઊભું કરવા આવ્યા હતા, જેમાં તપાસ દરમિયાન વધુ ત્રણ નવા ડ્રગ સપ્લાયરોના નામ પણ ખૂલી ગયા છે.