અમદાવાદ શહેરના પૂર્વ વિસ્તારમાં પીવાના શુદ્ધ પાણીના દાવાઓ વચ્ચે તંત્રની ઘોર બેદરકારી સામે આવી છે. અમદાવાદ શહેરના મેમ્કો વિસ્તારમાં આવેલા સૈજપુર વોર્ડમાં દૂષિત પાણીના કારણે સ્થાનિક રહીશો ત્રાહિમામ પોકારી ઉઠ્યા છે. આ વિસ્તારમાં ઘરોમાં પીવાના પાણીની લાઈનમાં ગટરનું ગંદુ પાણી મિક્સ થઈને આવતું હોવાના ગંભીર આક્ષેપો ઉઠ્યા છે. આ પાણીમાં તીવ્ર ગંધ પણ આવે છે.
અનિલ વકીલની ચાલીમાં રોગચાળાની ભીતિ
અમદાવાદ શહેરના સૈજપુર વોર્ડમાં આવેલી અનિલ વકીલની ચાલીમાં છેલ્લા ઘણા સમયથી નળમાં દૂષિત અને વાસ મારતું પાણી આવી રહ્યું છે. આ ઝેરી સમાન દૂષિત પાણી પીવાના કારણે સ્થાનિકોમાં રોગચાળો ફાટી નીકળ્યો છે. વિસ્તારમાં ઝાડા-ઉલ્ટી અને પેટના દુખાવાના અસંખ્ય કેસો સામે આવી રહ્યા છે. નાના બાળકોથી લઈને મોટેરાઓ આ દૂષિત પાણીના કારણે બીમાર પડી રહ્યા છે, જેને પગલે સ્થાનિકોમાં તંત્ર સામે ભારે આક્રોશ જોવા મળી રહ્યો છે. જો આ દૂષિત પાણીની સમસ્યાનો ઉકેલ નહીં આવે તો ઉગ્ર આંદોલન અને ભૂખ હડતાલ કરવા સુધીની તૈયારી સ્થાનિકોએ દર્શાવી છે.
