અમદાવાદ શહેરના નરોડામાં સગીરાની સુરક્ષા અને સોશિયલ મીડિયાના દૂષણને ઉજાગર કરતી એક શરમજનક ઘટના સામે આવી છે. ૨૧ વર્ષીય આરોપી જયદીપ રબારી, જે વ્યવસાયે ડ્રાઇવિંગ સાથે સંકળાયેલો છે, તે સોશિયલ મીડિયાના માધ્યમથી નરોડા વિસ્તારમાં રહેતી એક સગીરાના સંપર્કમાં આવ્યો હતો.
સગીરાને લગ્નની લાલચ આપી દુષ્કર્મ આચર્યું
આરોપીએ સગીરાને પ્રેમજાળમાં ફસાવી લગ્ન કરવાની ખોટી લાલચ આપી હતી અને ત્યારબાદ તેની સાથે શારીરિક સંબંધો બાંધી દુષ્કર્મ આચર્યું હતું. આ દરમિયાન આરોપીએ સગીરાનો આપત્તિજનક વીડિયો પણ પોતાના મોબાઇલમાં કંડારી લીધો હતો.દુષ્કર્મ આચર્યા બાદ આરોપી જયદીપ રબારીએ આ વિકૃત વીડિયો સોશિયલ મીડિયા પર વાયરલ કરી દીધો હતો. વીડિયો વાયરલ થવાના કારણે સગીરાની થયેલી સગાઈ તૂટી ગઈ હતી અને તેને ભારે સામાજિક બદનામી સહન કરવાનો વારો આવ્યો હતો.