અમદાવાદ શહેરના નવા વાડજ વિસ્તારમાં ફટાકડા ફોડવા જેવી સામાન્ય બાબતે થયેલી તકરારે મોટું રાજકીય અને પોલીસ વિવાદનું સ્વરૂપ ધારણ કરી લીધું છે. વાડજ પોલીસ સ્ટેશનની હદમાં રહેતા મહિલા પી.એસ.આઈ. (PSI) ચુડાસમાએ સ્થાનિક ભાજપ કોર્પોરેટર વિરાટ પુરોહિત અને તેમના સાગરીતો સામે ગંભીર આક્ષેપો સાથે વાડજ પોલીસ સ્ટેશનમાં લેખિત અરજી આપી છે.
મહિલા PSIનો આક્ષેપ છે કે કોર્પોરેટર અને તેમના સાગરીતોએ તેમના ઘરે આવીને ગેરવર્તણૂક કરી ઝપાઝપી કરી હતી. આ સમગ્ર મામલે સોસાયટીના સીસીટીવી (CCTV) ફૂટેજ પણ સામે આવ્યા છે, જ્યારે બીજી તરફ ભાજપ કોર્પોરેટરે પોતાના પર લાગેલા તમામ આક્ષેપોને પાયાવિહોણા ગણાવી ફગાવી દીધા છે અને સામસામે પોલીસ અરજીઓ થતાં મામલો ગરમાયો છે.
નવા વાડજ સ્થિત સોસાયટીમાં ફટાકડા ફોડ્યા બાદ ગાડીને નુકસાન થવા બાબતે બોલાચાલી શરૂ થઈ હતી, જેણે ઉગ્ર ઝઘડાનું સ્વરૂપ લીધું હતું. મહિલા PSI ચુડાસમા પોતાની દીકરી સાથે ઘરમાં એકલા રહે છે. તેમણે આક્ષેપ કર્યો છે કે સ્થાનિક ભાજપ કોર્પોરેટર વિરાટ પુરોહિત અને તેમના સાગરીતોએ ઘરે આવીને દાદાગીરી કરી ગેરવર્તણૂક અને ઝપાઝપી કરી હતી.ઘટના બાદ મહિલા PSIએ તાત્કાલિક પોલીસ કંટ્રોલ રૂમ (112) પર ફોન કરીને મદદ બોલાવી હતી અને ઈજા કે માનસિક આઘાતને પગલે સારવાર અર્થે સોલા સિવિલ હોસ્પિટલ ખાતે ખસેડાયા હતા.
સોસાયટીમાં થયેલી બબાલના CCTV ફૂટેજ સામે આવ્યા છે. વાડજ પોલીસ સ્ટેશનમાં કોર્પોરેટર વિરાટ પુરોહિત અને તેમના સાગરીતો સામે અરજી આપવામાં આવી છે, તો સામે પક્ષે પણ અરજી થતાં પોલીસે તપાસ હાથ ધરી છે.આ સમગ્ર વિવાદ અંગે ભાજપ કોર્પોરેટર વિરાટ પુરોહિતે પોતાનો પક્ષ રજૂ કરતાં જણાવ્યું છે કે તેમના પર લગાવવામાં આવેલા ઝપાઝપી અને ગેરવર્તણૂકના તમામ આક્ષેપો તદ્દન પાયાવિહોણા અને ખોટા છે.
મહિલા PSI દ્વારા કરાયેલા આક્ષેપો બાદ, આજે ભાજપ કોર્પોરેટર વિરાટ પુરોહિત તેમજ આ કેસમાં સંડોવાયેલા સોસાયટીના રહીશો દેવાંગ પટેલ અને હિરલ પટેલે મીડિયા સમક્ષ આવીને પોતાના નિવેદનો આપ્યા છે અને તમામ આક્ષેપોને ફગાવી દીધા છે. બીજી તરફ, મહિલા PSIએ હજુ સુધી સત્તાવાર ફરિયાદ ન લેવાઈ હોવાનો દાવો કર્યો છે, જોકે ગઈકાલે પાટા બાંધેલી હાલતમાં ફોટો સામે આવ્યા બાદ આજે તેઓ જાતે કાર ચલાવીને (સેલ્ફ ડ્રાઈવ) જતા જોવા મળતા અનેક તર્ક-વિતર્ક સર્જાયા છે.