ચોમાસાની શરૂઆતમાં જ અમદાવાદ શહેરમાં પડેલા સામાન્ય વરસાદે મ્યુનિસિપલ કોર્પોરેશન ની પ્રિ-મોન્સૂન કામગીરી અને રોડની ગુણવત્તાના ધજાગરા ઉડાવી દીધા છે. માત્ર પ્રાથમિક વરસાદ પડતાં જ શહેરના સ્માર્ટ રોડ ધોવાઈ ગયા છે અને ચોતરફ બિસ્માર હાલત જોવા મળી રહી છે. તંત્રના મોટા-મોટા દાવાઓ વચ્ચે પહેલા જ વરસાદમાં રસ્તાઓની નબળી ગુણવત્તા ખુલ્લી પડી ગઈ છે અને હાલમાં શહેરના વિવિધ મુખ્ય માર્ગો પર 2000થી વધુ ખતરનાક ખાડાઓ પડી ગયા છે જે વાહનચાલકો અને રાહદારીઓ માટે ભારે જીવનું જોખમ ઊભું કરી રહ્યા છે.
964 મેટ્રિક ટન હોટ મિક્સ મટીરિયલ વપરાયું
મળતી માહિતી અનુસાર મ્યુનિસિપલ કોર્પોરેશન દ્વારા ચોમાસા દરમિયાન રસ્તાઓના સમારકામ માટે અત્યાર સુધીમાં અધધ 964 મેટ્રિક ટન હોટ મિક્સ મટીરિયલ વાપરવામાં આવ્યો છે. જેમાં ઝોન વાઇઝ વિગતો જોઈએ તો, સૌથી વધુ પૂર્વ પશ્ચિમ ઝોનમાં 336.460 મેટ્રિક ટન અને પૂર્વ ઝોનમાં 226.720 મેટ્રિક ટન જથ્થો વપરાયો છે. આ ઉપરાંત પશ્ચિમ ઝોનમાં 136.510 મેટ્રિક ટન, દક્ષિણ ઝોનમાં 124.970 મેટ્રિક ટન, દક્ષિણ પશ્ચિમ ઝોનમાં 83.700 મેટ્રિક ટન અને ઉત્તર ઝોનમાં 56.06 મેટ્રિક ટન મટીરિયલનો ઉપયોગ રસ્તા સરખા કરવા માટે કરવામાં આવ્યો છે.