અમદાવાદ શહેરમાં નવરાત્રિનો તહેવાર પૂર્ણ થતાં જ રોગચાળાએ માથું ઊંચક્યું છે. હાલમાં અનુભવાઈ રહેલી મિશ્ર ઋતુ અને બદલાતા હવામાનની સીધી વિપરીત અસર લોકોના આરોગ્ય પર પડી રહી છે. બેવડી ઋતુના કારણે શહેરમાં ઘર-ઘર વાયરલ ઈન્ફેક્શન, તાવ, શરદી અને ઉધરસના દર્દીઓની સંખ્યામાં ચિંતાજનક વધારો નોંધાઈ રહ્યો છે, જેના લીધે હોસ્પિટલોમાં દર્દીઓની ભારે ભીડ જોવા મળી રહી છે.
સોલા સિવિલમાં દર્દીઓનો જમાવડો, OPD નો આંકડો 13,606 ને પાર
અમદાવાદની સોલા સિવિલ હોસ્પિટલમાંથી પ્રાપ્ત થયેલા તાજા આંકડા અનુસાર, તાજેતરમાં હોસ્પિટલની કુલ OPD 13,606 પર પહોંચી ગઈ છે. તબીબોના જણાવ્યા મુજબ, દરરોજ તાવ, ઉધરસ, શરદી અને વાયરલ ઈન્ફેક્શનના 100 થી વધુ દર્દીઓ સારવાર અર્થે આવી રહ્યા છે. આ સિવાય બદલાતા હવામાનના કારણે બાળકો પણ ઝડપથી બીમાર પડી રહ્યા છે, જેથી પીડિયાટ્રિક (બાળકોની) OPD નો દૈનિક આંકડો પણ 100 ને પાર થઈ ગયો છે.
