અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર મુસાફરોની હાલાકીનો એક મોટો મામલો સામે આવ્યો છે. સ્પાઇસજેટ એરલાઇન્સની બાગડોગરા જતી ફ્લાઇટ અચાનક રદ્દ કરવામાં આવતા મુસાફરો મુશ્કેલીમાં મુકાયા હતા અને એરપોર્ટ પર ભારે રોષ તેમજ હોબાળો જોવા મળ્યો હતો.

190 જેટલા મુસાફરો ટર્મિનલ-2 પર અટવાયા

મળતી માહિતી મુજબ, અમદાવાદથી બાગડોગરા જનારી આ ફ્લાઇટનો સમય બપોરે 03:20 કલાકનો હતો. સવારથી જ ફ્લાઇટ રદ થયાના સમાચાર મળતા અંદાજિત 190 જેટલા મુસાફરો ટર્મિનલ-2 ના ગેટ નંબર-5 પર ફસાઈ ગયા હતા. આ મુસાફરોમાં માત્ર અમદાવાદ જ નહીં પરંતુ સુરત, મહેસાણા અને જેતપુર સહિતના ગુજરાતના અન્ય વિવિધ જિલ્લાઓમાંથી આવેલા પ્રવાસીઓ પણ સામેલ હતા.

બોર્ડિંગ પાસ હોવા છતાં પ્રવેશ ન અપાયાનો આક્ષેપ

મુસાફરોએ એરલાઇન્સ પર ગંભીર આક્ષેપ કરતા જણાવ્યું હતું કે, તેમની પાસે વેલિડ બોર્ડિંગ પાસ હોવા છતાં તેમને ટર્મિનલની અંદર પ્રવેશ આપવામાં આવ્યો ન હતો. અચાનક ફ્લાઇટ રદ્દ થવા અને એરલાઇન્સ તરફથી યોગ્ય જવાબ કે વૈકલ્પિક વ્યવસ્થા ન મળવાના કારણે મુસાફરોનો રોષ સાતમા આસમાને પહોંચ્યો હતો.

https://x.com/sandeshnews/status/2119732412410482697?ref_src=twsrc%5Etfw%7Ctwcamp%5Etweetembed%7Ctwterm%5E2119732412410482697%7Ctwgr%5E%7Ctwcon%5Es1_c10&ref_url=

ગેટ નંબર 5 પર મુસાફરોનો ધરણા અને વિરોધ પ્રદર્શન

પ્રશ્નોનું યોગ્ય નિરાકરણ ન આવે અને એરલાઇન્સ તરફથી કોઈ સંતોષકારક જવાબ ન મળે ત્યાં સુધી પોતાની હડતાળ કે વિરોધ ચાલુ રાખવાની ચીમકી આપીને મુસાફરો ટર્મિનલ-2 ના 5 નંબરના ગેટ પર જ ધરણા પર બેસી ગયા હતા. આ ઘટનાના કારણે એરપોર્ટ પર થોડા સમય માટે અફરાતફરી જેવો માહોલ સર્જાયો હતો.


આ પણ વાંચો: Ahmedabad News: સાવધાન! ટિન્ડર એપથી હનીટ્રેપ, વેપારી પાસેથી ક્રાઈમ બ્રાન્ચના નામે લાખો પડાવ્યા