ચોમાસાની ઋતુ શરૂ થતાં જ અમદાવાદ મ્યુનિસિપલ કોર્પોરેશનના પ્રિ-મોનસૂન એક્શન પ્લાનના દાવાઓ પાણીમાં ધોવાઈ ગયા છે. દર વર્ષે તંત્ર દાવો કરે છે કે મે મહિનાના અંત સુધીમાં રોડ અને ગટરના તમામ ખોદકામ બંધ કરી દેવાશે, પરંતુ અમદાવાદના પશ્ચિમ વિસ્તારના સૌથી પોશ ગણાતા થલતેજમાં ચિત્ર સદંતર વિપરીત છે. થલતેજના મુખ્ય આંતરિક રસ્તાઓ અને સોસાયટીના એપ્રોચ રોડ પર ગટર અને ડ્રેનેજ લાઇન નાખવાના કામો હજુ પણ લાઈવ અધૂરા પડ્યા છે, જેના કારણે સ્થાનિક જનતા નર્કાગાર ભોગવવા મજબૂર બની છે.
ખુલ્લી ગટરો અને બહાર નીકળેલા સળિયા
ગ્રાઉન્ડ લેવલ પર સ્થિતિ એટલી ખરાબ છે કે ગટર લાઇનના કામ માટે રસ્તાઓ તો ખોદી નાખવામાં આવ્યા, પરંતુ કામ પૂરું થયા પછી તેના પર યોગ્ય પુરાણ કે સીસી રોડ કરવામાં આવ્યો નથી. રસ્તાની બરોબર વચ્ચે લોખંડના મજબૂત સળિયા બહાર નીકળેલા લાઈવ જોઈ શકાય છે. રાત્રિના સમયે કે સામાન્ય વરસાદમાં જો કોઈ દ્વિચક્રી વાહનચાલક આ સળિયા પરથી પસાર થાય, તો મોટો અકસ્માત થવો નિશ્ચિત છે. આ ઉપરાંત, ગટરના મેનહોલના ઢાંકણા પણ પ્રોપર ફિટ કરવાના બદલે અડધા ખુલ્લા અથવા અસ્તવ્યસ્ત છોડી દેવાયા છે. વરસાદી પાણી ભરાવાને કારણે જો આ ખુલ્લા મેનહોલ ન દેખાય, તો કોઈ માસૂમ બાળક કે વાહનચાલક તેમાં ગરકાવ થઈ શકે છે.
