અમદાવાદ શહેરમાં ચોમાસાની ઋતુ વચ્ચે રોગચાળાએ ભારે અજગરી ભરડો લીધો છે. ઓગસ્ટ મહિનાના માત્ર પ્રથમ 15 દિવસમાં જ મેલેરિયાના 48 કેસ (ચાલુ વર્ષે કુલ 223), ડેન્ગ્યુના 68 કેસ (ચાલુ વર્ષે કુલ 295) અને ઝેરી મેલેરિયાના 6 કેસ (ચાલુ વર્ષે કુલ 25) નોંધાયા છે. બીજી તરફ, પીવાના પાણીના 18 નમૂના ફેલ થતાં પાણીજન્ય રોગચાળો પણ વકર્યો છે, જેમાં આ 15 દિવસમાં જ ઝાડા-ઊલટીના 192 (કુલ 3,748), ટાઈફોઈડના 95 (કુલ 1,296) અને કમળાના 39 કેસ (કુલ 491) સામે આવતા આરોગ્ય તંત્ર દોડતું થયું છે.
શહેરની જાણીતી હોસ્પિટલો જ બની મચ્છરોનું બ્રીડિંગ સેન્ટર
રોગચાળાની ગંભીર સ્થિતિ વચ્ચે સૌથી ચોંકાવનારી બાબત એ સામે આવી છે કે દર્દીઓને સાજા કરતી હોસ્પિટલ સંકુલો જ મચ્છરજન્ય રોગોની જન્મદાતા બની છે. AMC ની તપાસ દરમિયાન વસ્ત્રાલની હેલ્થ-1, સૈજપુરની ચૌધરી, શાહીબાગની રાજસ્થાન, નિકોલની દેવસ્ય અને ચાંદલોડિયાની શાલીન હોસ્પિટલ ઉપરાંત સરદારનગરની એમ.એમ. સિંધી નર્સિંગ કોલેજમાંથી મચ્છરોના પોરા મળી આવ્યા છે. હોસ્પિટલ જેવા સંવેદનશીલ સ્થળોએ જ બ્રીડિંગ મળી આવતાં તંત્ર પણ હરકતમાં આવ્યું છે.