અમદાવાદમાં થોડા સમય પહેલા મનપાના સારંગપુર ખાતેના સ્વિમીંગપુલમાં અસામાજિક તત્વોએ મોડી રાત્રે આતંક મચાવ્યો હતો. આ ઘટનામાં વાયરલ થયેલા વીડિયોમાં રાતના સમયે બંધ કરવામાં આવેલા સ્વિમિંગ પુલમાં 10થી 15 જેટલા શખ્સો ઘૂસ્યા હતાં. આ તત્વોએ મોટા અવાજે ગીતો વગાડીને પુલમાં તોફાન આચર્યું હતું. આ ઘટના બાદ હવે શહેરમાં વસ્ત્રાલ સ્પોર્ટ્સ કોમ્પલેક્સનો વિવાદ સામે આવ્યો છે. જેમાં સ્વિમિંગ પુલમાં ન્હાવાની મજા માણતા મહિલા અને પુરૂષોનો એક વીડિયો વાયરલ થયા બાદ એક્શન પણ લેવાયા છે. 

વિદ્યાર્થીઓની દાદાગીરી અને કાર્ડ રદની ફરિયાદ

અમદાવાદના વસ્ત્રાલ સ્પોર્ટ્સ કોમ્પ્લેક્સ ખાતે આવેલા સ્વિમિંગ પુલમાં મહિલા અને પુરુષોના વીડિયો સોશિયલ મીડિયા પર વાયરલ થતા મોટો વિવાદ સર્જાયો છે. આ ઘટના બાદ તંત્ર દ્વારા પારદર્શક તપાસ કરવાને બદલે ત્યાં આવેલી લાયબ્રેરીના વિદ્યાર્થીઓ સામે જ એકતરફી કાર્યવાહી કરી દેવામાં આવી હોવાના ગંભીર આક્ષેપો ઉઠ્યા છે.વિદ્યાર્થીઓનો આરોપ છે કે ઘટના અંગે તેમની સાથે દાદાગીરી કરવામાં આવી રહી છે અને લાયબ્રેરીમાં ન આવવા માટે ધમકીઓ આપીને તેમના પ્રવેશ કાર્ડ રદ કરી દેવામાં આવ્યા છે.

પારદર્શક તપાસ વગર કરાયેલી કામગીરીથી રોષ

કોઈપણ પ્રકારની યોગ્ય કે નિષ્પક્ષ તપાસ વગર જ વિદ્યાર્થીઓ પર દોષનો ટોપલો ઢોળી દેવામાં આવતા તેમનામાં ભારે રોષ અને નારાજગી વ્યાપી ગઈ છે. સંસ્થાના આ પ્રકારના અણધડ અને તાનાશાહી ભર્યા વલણ સામે વિદ્યાર્થીઓએ વિરોધ નોંધાવ્યો છે. વીડિયો વાયરલ કરવા પાછળના સાચા જવાબદારો સામે પગલાં લેવાને બદલે નિર્દોષ અભ્યાસ કરતા વિદ્યાર્થીઓનું ભવિષ્ય અને અભ્યાસ બગાડવામાં આવી રહ્યો હોવાથી આ સમગ્ર મામલે ઉચ્ચ કક્ષાએથી ન્યાયી તપાસ થાય તેવી માંગ ઉઠી રહી છે.


આ પણ વાંચોઃ Anand રેલ્વે સ્ટેશન નજીક માલગાડીના બે ડબ્બા ટ્રેક પરથી ઉતર્યા: મોટી દુર્ઘટના ટળી