અમદાવાદના પોશ ગણાતા વસ્ત્રાપુર વિસ્તારમાં પશ્ચિમ વિસ્તારમાં સક્રિય 'ગોડ ગેંગ'ના કુખ્યાત શખ્સોએ કાયદો અને વ્યવસ્થાના ધજાગરા ઉડાવીને અપહરણ, મારામારી, તોડફોડ અને લૂંટની ઘટનાને અંજામ આપ્યો છે. જૂની અદાવત રાખીને ગુજસીટોક (GUJCTOC)ના કેસમાં તાજેતરમાં જ જેલમાંથી છૂટેલા સંજય દેસાઈ (રબારી) સહિત 4 આરોપીઓએ વેપારીનું અપહરણ કરી માર માર્યો હતો અને ત્યારબાદ ઇન્દ્રપ્રસ્થ ટાવર પાસે આવેલી 'સેલ્ફ ડ્રાઇવ કાર રેન્ટ સર્વિસ'ની ઓફિસમાં તોડફોડ કરીને ₹1,01,600ની લૂંટ ચલાવી હતી.

વસ્ત્રાપુર તળાવ પાસેથી અપહરણ

ઘટનાની વિગતો અનુસાર, ફરિયાદી સૌરવ ગુપ્તા ગઈકાલે રાત્રે વસ્ત્રાપુર તળાવ પાસેથી પસાર થઈ રહ્યા હતા, તે સમયે જૂની અદાવતમાં સંજય દેસાઈ અને તેના સાગરીતોએ તેમનું અપહરણ કરીને ઢોર માર માર્યો હતો અને જાનથી મારી નાખવાની ધમકી આપી હતી. ત્યારબાદ આરોપીઓએ ફરિયાદીની દુકાને આવીને ₹1,01,600ની રોકડ રકમ લૂંટી લીધી હતી. એટલું જ નહીં, જ્યારે ફરિયાદી વેપારી ન્યાય માટે વસ્ત્રાપુર પોલીસ સ્ટેશનમાં ફરિયાદ લખાવવા પહોંચ્યા, તે જ સમયે આરોપીઓએ વધુ બેફામ બનીને ઇન્દ્રપ્રસ્થ ટાવર પાસે આવેલી તેમની સેલ્ફ ડ્રાઇવ રેન્ટલની ઓફિસમાં ઘૂસી ભારે તોડફોડ મચાવી હતી.

આરોપી સંજય દેસાઈ સામે 45થી વધુ ગુના હોવાનો દાવો

ફરિયાદી સૌરવ ગુપ્તાએ દાવો કર્યો છે કે મુખ્ય આરોપી સંજય દેસાઈ સામે અગાઉ 45થી વધુ ગુનાઓ નોંધાયેલા છે, જ્યારે પોલીસ રેકોર્ડ મુજબ તેના વિરુદ્ધ વ્યાજ વટાવ અને લૂંટ સહિતના 24 જેટલા ગંભીર ગુના નોંધાયા હતા અને તે તાજેતરમાં જ ગુજસીટોક હેઠળ જેલમાંથી મુક્ત થયો હતો. આ સમગ્ર મામલે વસ્ત્રાપુર પોલીસે સંજય રબારી (દેસાઈ), વિશાલ રબારી, સાહિલ રબારી અને રવિ રબારી એમ કુલ 4 આરોપીઓ વિરુદ્ધ અપહરણ, લૂંટ, હુમલો અને જાનથી મારી નાખવાની ધમકી સહિતની વિવિધ કલમો હેઠળ ગુનો નોંધ્યો છે.

'ગોડ ગેંગ'ના આરોપીઓને ઝડપી પાડવા પોલીસની અલગ-અલગ ટીમો કાર્યરત

શહેરના પશ્ચિમ વિસ્તારમાં આતંક મચાવનાર 'ગોડ ગેંગ'ના આ ચારેય આરોપીઓને વહેલી તકે ઝડપી પાડવા માટે વસ્ત્રાપુર પોલીસે અલગ-અલગ ટીમો બનાવીને તપાસનો ધમધમાટ તેજ કર્યો છે. પોશ વિસ્તારમાં બનેલી અપહરણ અને લૂંટની આ ઘટના બાદ સ્થાનિક વેપારીઓમાં પણ ભારે રોષ અને ફફડાટ જોવા મળી રહ્યો છે.

આ પણ વાંચો: Junagadh: જવાહર ચાવડાએ પેપર લીક મુદ્દે સિસ્ટમને લીધી આડેહાથ, કહ્યું- '91 લાખ યુવાનોની વેદના સામે સિસ્ટમ લાચાર