અમદાવાદ મ્યુનિસિપલ કોર્પોરેશન (AMC) ના દક્ષિણ-પૂર્વ ઝોનમાં આવેલા વટવા વિસ્તારના 'ચાર માળીયા' આવાસ પંથકમાં આજે સવારે એકાએક આગ લાગવાની ઘટનાથી સ્થાનિક લોકોના જીવ તાળવે ચોંટી ગયા છે. આવાસ યોજનાના એક બ્લોકના મકાનમાંથી અચાનક ધુમાડો નીકળવાનો શરૂ થયો હતો અને જોતજોતામાં આગની ભયાનક જ્વાળાઓએ આખા મકાનને પોતાની ઝપેટમાં લઈ લીધું હતું. સવારના સમયે બનેલી આ ઘટનાને કારણે ઘરોમાં હાજર લોકો જીવ બચાવવા માટે નીચે ખુલ્લા મેદાન તરફ દોડ્યા હતા.
લોકો ફસાયા હોવાની આશંકા વચ્ચે રેસ્ક્યુ ઓપરેશન તેજ
ચાર માળની આ ઈમારતોમાં અસંખ્ય પરિવારો વસવાટ કરે છે, જેના કારણે આગ લાગતાની સાથે જ બિલ્ડિંગના દાદરા (સીડીઓ) પર ધુમાડો ભરાઈ ગયો હતો. પરિણામે ઉપરના માળના કેટલાક રહિશો ત્યાં જ ફસાઈ ગયા હતા. ઘટનાની ગંભીરતાને સમજીને અમદાવાદ ફાયર કંટ્રોલ રૂમ દ્વારા તાત્કાલિક ધોરણે વટવા અને નજીકના ફાયર સ્ટેશનથી 3 ફાયર ફાઇટર્સની ગાડીઓ ઘટનાસ્થળે રવાના કરી દેવામાં આવી હતી.
