શક્તિપીઠ અંબાજી ખાતે નવરાત્રિના પવિત્ર મહાપર્વના પ્રથમ દિવસે જ લાખોની સંખ્યામાં માઈભક્તો ઉમટી પડ્યા છે, પરંતુ વહીવટી તંત્રની નબળી વ્યવસ્થાઓના કારણે યાત્રિકોને ભારે હાલાકીનો સામનો કરવો પડ્યો છે. અંબાજીમાં ગબ્બરથી લઈને દાંતા સર્કલ સુધીના મુખ્ય માર્ગો પર ભારે ટ્રાફિક જામ સર્જાતા હજારો વાહનો રસ્તા પર જ થંભી ગયા હતા. તહેવારના પહેલા જ દિવસે સર્જાયેલી આ અરાજકતાથી દર્શનાર્થે આવેલા શ્રદ્ધાળુઓની મુશ્કેલીઓમાં ભારે વધારો થયો છે.
છેલ્લા 4 કલાકથી ટ્રાફિકમાં ફસાયા યાત્રિકો
મળતી માહિતી મુજબ, અંબાજી આવતા માર્ગો પર ટ્રાફિકની ગંભીર સમસ્યાના કારણે યાત્રિકો છેલ્લા 4 કલાકથી વધુ સમયથી ટ્રાફિકમાં ફસાયેલા છે. તહેવારોની સિઝનમાં ટ્રાફિક નિયંત્રણ માટે પૂરતી પોલીસ ટીમ કે ટ્રાફિક જવાનો તૈનાત ન હોવાને કારણે વાહનોની અનિયમિત અવરજવરથી પરિસ્થિતિ વધુ વણસી હતી. પોલીસ પ્રશાસનની ઘોર બેદરકારી અને આયોજનના અભાવને કારણે ભક્તોમાં તંત્ર સામે ભારે રોષ જોવા મળી રહ્યો છે.