શક્તિ, ભક્તિ અને આસ્થાના ત્રિવેણી સંગમ સમાન સુપ્રસિદ્ધ યાત્રાધામ અંબાજી મંદિર માટે આ વર્ષનું બેસતું વર્ષ એટલે કે નવો દિવસ ખૂબ જ શુભ સાબિત થયો છે. નવા વર્ષના પવિત્ર દિવસે અંબાજી મંદિર ટ્રસ્ટને એક ગુપ્ત દાતા તરફથી સોનાનું મોટું દાન મળ્યું છે. આ ભક્ત દ્વારા માતા અંબાના ચરણોમાં કુલ 100 ગ્રામ સોનું અર્પણ કરવામાં આવ્યું છે. હાલના બજાર ભાવ પ્રમાણે આ દાનની કિંમત અંદાજે રૂપિયા 13,00,000 (તેર લાખ રૂપિયા) જેટલી આંકવામાં આવી રહી છે, જે માઁ અંબા પ્રત્યેની ભક્તોની અતૂટ શ્રદ્ધા દર્શાવે છે.
ઓળખ ગુપ્ત રાખીને કર્યું મહાદાન
સોનાનું આટલું મોટું દાન કરનાર ભક્તે પોતાની ઓળખ સંપૂર્ણપણે ગુપ્ત રાખવાની ઇચ્છા વ્યક્ત કરી હતી. માઁ અંબાના ચરણે અર્પણ કરાયેલું આ મહાદાન અંબાજી મંદિર ટ્રસ્ટના ટેમ્પલ ઇન્સ્પેક્ટર પ્રવીણભાઈ ગોસ્વામીએ વિધિવત રીતે સ્વીકાર્યું હતું. અંબાજી મંદિર ટ્રસ્ટ લાંબા સમયથી મંદિરના શિખરને સોનાથી મઢવાની ભગીરથ કામગીરી કરી રહ્યું છે, જેના માટે દેશ-વિદેશના માઇભક્તો દિલ ખોલીને સોનાનું દાન કરી રહ્યા છે. આ ગુપ્ત દાનનો ઉપયોગ પણ મંદિરના શિખરને સુવર્ણજડિત બનાવવાની કામગીરીમાં લેવામાં આવશે.
