આજે સમગ્ર ગુજરાતમાં ભારેથી અતિભારે વરસાદની આગાહી કરવામાં આવી છે. અમદાવાદ, સુરત, વડોદરા સહિતના શહેરોમાં વરસાદનું રેડ એલર્ટ જાહેર કરવામાં આવ્યું છે. વરસાદને કારણે લોકોને મુશ્કેલીમાંથી રાહત આપવા માટે વહીવટી તંત્ર પણ હાઈએલર્ટ મોડ પર આવી ગયું છે.ભારે વરસાદને પગલે આણંદ જિલ્લા કલેક્ટર દ્વારા લોકોને બિનજરૂરી મુસાફરી ટાળવા અપીલ કરવામાં આવી છે.વરસાદને પગલે કોઈપણ પ્રકારની ઇમરજન્સી સ્થિતિમાં તાત્કાલિક મદદ મળી રહે તે માટે જિલ્લા કંટ્રોલ રૂમ કાર્યરત કરવામાં આવ્યો છે.
આણંદ અને પેટલાદમાં પણ 5 ઇંચથી વધુ વરસાદ
તંત્ર દ્વારા પરિસ્થિતિ પર સતત નજર રાખવામાં આવી રહી છે. આણંદ જિલ્લામાં અનેક વિસ્તારોમાં ભારે વરસાદ નોંધાયો છે.બોરસદમાં સૌથી વધુ 6 ઇંચ વરસાદ ખાબક્યો છે, જ્યારે ખંભાતમાં 5 ઇંચથી વધુ વરસાદ નોંધાયો છે. આણંદ અને પેટલાદમાં પણ 5 ઇંચથી વધુ વરસાદ પડ્યો છે.સોજિત્રા અને તારાપુરમાં પણ મેઘમહેર જોવા મળી છે, જ્યારે ઉમરેઠ અને આંકલાવમાં નોંધપાત્ર વરસાદ નોંધાતા નીચાણવાળા વિસ્તારોમાં પાણી ભરાવાની સ્થિતિ સર્જાઈ છે. શહેરમાં રેડ એલર્ટ વચ્ચે જળબંબાકારની સ્થિતિ સર્જાઈ છે.