Anand News : તારાપુર-ધર્મજ હાઈવે પર ગંભીર અકસ્માત, બે યુવાનોના મોત

આણંદ જિલ્લાના તારાપુર ધર્મજ હાઈવે પર એક ગમખ્વાર અકસ્માત સર્જાયો હતો. જેમાં અજાણ્યા વાહનની ટક્કરે બાઈક સવાર બે યુવાનોના ઘટનાસ્થળે જ કરૂણ મોત નીપજ્ય હતા. આ ઘટનાને પગલે વાહનચાલકો અને સ્થાનિકોમાં શોક વ્યાપી ગયો હતો. આ મામલે પોલીસને જાણ કરવામાં આવી હતી અને પોલીસ ઘટનાસ્થળે પહોંચી હતી.

તારાપુ-ધર્મજ હાઈવે પર અકસ્માત

મળતી જાણકારી અનુસાર, આજે વહેલી સવારે અથવા મોડી રાત્રિના સુમારે તારાપુર-ધર્મજ હાઈવે પરથી પસાર થઇ રહેલા એક બાઈકને કોઈ અજાણ્યા વાહને જોરદાર ટક્કર મારી હતી. ટક્કર એટલી ભયાવહ હતી કે બાઈક પર સવાર બંને યુવાનો ગંભીર રીતે ઘવાયા હતા અને તેમણે ઘટનાસ્થળે જ દમ તોડ્યો હતો.

મૃતક વડોદરાના સાવલીના રહેવાસી

પોલીસ પાસેથી મળતી જાણકારી અનુસાર, મૃતક બંને યુવાનો વડોદરા જિલ્લાના સાવલી તાલુકાના રહેવાસી હતા. ઘટનાની જાણ થતાં જ પેટલાદ ગ્રામ્ય પોલીસનો કાફલો ઘટનાસ્થળે દોડી આવ્યો હતો. પોલીસે મૃતદેહોને પોસ્ટમોર્ટમ માટે ખસેડી અજાણ્યા વાહનચાલક વિરુદ્ધ ગુનો નોંધી તપાસ હાથ ધરી છે. પોલીસે આસપાસના CCTV ફૂટેજ અને અન્ય પુરાવાઓના આધારે અજાણ્યા વાહન અને તેના ચાલકને શોધી કાઢવા માટે ચક્રો ગતિમાન કર્યા છે.