બનાસકાંઠા જિલ્લાના કાંકરેજ તાલુકાના થરા નગરપાલિકા ચૂંટણી પરિણામોમાં ભારતીય જનતા પાર્ટી (BJP) એ ભવ્ય અને એકચક્રી વિજય મેળવ્યો છે. ભાજપે થરા નગરપાલિકાની કુલ 19 બેઠકો પર શાનદાર જીત નોંધાવીને પોતાનો ગઢ અકબંધ રાખ્યો છે. આ ઐતિહાસિક જીત બાદ સમગ્ર થરા શહેરમાં ભાજપના નેતાઓ અને કાર્યકરો દ્વારા ઢોલ-નગારા અને ગુલાલની ઉડામણ સાથે ભવ્ય વિજય સરઘસ કાઢવામાં આવ્યું હતું, જેમાં મોટી સંખ્યામાં સમર્થકો જોડાયા હતા.

જીત બાદ થરાના બજારોમાં ભગવો લહેરાયો

ચૂંટણી પરિણામો જાહેર થતાંની સાથે જ થરા શહેરના મુખ્ય માર્ગો અને બજારોમાં કેસરિયો માહોલ છવાઈ ગયો હતો. ભાજપના વિજય સરઘસ દરમિયાન આખા બજારમાં 'જે જે શ્રી રામ' અને 'ભારત માતા કી જય' ના નારા ગૂંજી ઉઠ્યા હતા. વેપારીઓ અને સ્થાનિક નાગરિકોએ પણ વિજય સરઘસનું ઉત્સાહભેર સ્વાગત કર્યું હતું અને નગરપાલિકા પર ભાજપની ભવ્ય વાપસીને વધાવી લીધી હતી.

"થરામાં કોંગ્રેસ-આપ નહીં ચાલે, મોદીના કાર્યોને જનસમર્થન મળ્યું": તાલુકા ભાજપ પ્રમુખ નટુભાઈ

આ ભવ્ય વિજય અંગે કાંકરેજ તાલુકા ભાજપ પ્રમુખ નટુભાઈએ 'સંદેશ' સાથે ખાસ વાતચીત કરતા પોતાની ખુશી વ્યક્ત કરી હતી. તેમણે જણાવ્યું હતું કે, થરાની જનતાએ દેશના વડાપ્રધાન નરેન્દ્ર મોદીના વિકાસ કાર્યો અને ભાજપની નીતિઓ પર પૂર્ણ વિશ્વાસ મૂક્યો છે. વિરોધી પક્ષો પર પ્રહાર કરતા તેમણે ઉમેર્યું હતું કે, "થરાની પવિત્ર ધરતી પર કોંગ્રેસ કે આમ આદમી પાર્ટી (AAP) જેવા પક્ષો ક્યારેય નહીં ચાલે, જનતાએ વિકાસના નામે ભાજપને સમર્થન આપીને આ સાબિત કરી દીધું છે."

આ પણ વાંચો : Ahmedabad News : ગુજરાત યુનિવર્સિટીમાં પ્રવેશ પ્રક્રિયા સંપન્ન, UG અને PGમાં મળીને 76,190 વિદ્યાર્થીઓએ પ્રવેશ મેળવ્યો...