Bhavnagar : મેડિકલ કોલેજમાં રેગિંગ મામલામાં ગૂંચવાયું કોકડું, પોલીસ ફરિયાદ કરવા જુનિયર વિદ્યાર્થીઓ ડરના માર્યા મૌન

ભાવનગરની સરકારી મેડિકલ કોલેજમાં પ્રથમ વર્ષના તબીબી વિદ્યાર્થીઓ સાથે રેગિંગ થઈ હોવાની એક અત્યંત ગંભીર ઘટના સામે આવતા શૈક્ષણિક આલમમાં ભારે ખળભળાટ મચી ગયો છે. જોકે, આ આખા મામલે દોષિતો સામે કાયદાકીય સકંજો કસવા માટેની પોલીસ ફરિયાદ પ્રક્રિયામાં મોટું કોકડું ગૂંચવાયું છે. સૂત્રો પાસેથી મળતી ચોંકાવનારી માહિતી મુજબ, મેડિકલ કોલેજના જે પ્રથમ વર્ષના વિદ્યાર્થીઓ આ રેગિંગનો ભોગ બન્યા છે, તેઓ ભવિષ્યની ચિંતા અથવા અજ્ઞાત ડરના કારણે પોલીસ ફરિયાદ નોંધાવવા માટે બિલકુલ તૈયાર નથી થઈ રહ્યા.

ડીન આ મામલાને હળવાશથી લેવાના મૂડમાં નથી

બીજી તરફ, કોલેજ પ્રશાસન અને મેડિકલ કોલેજના ડીન આ મામલાને હળવાશથી લેવાના મૂડમાં નથી. તેઓ રેગિંગ કરનારા સિનિયર તત્વો સામે કડક કાનૂની કાર્યવાહી કરવા માટે સંપૂર્ણપણે મક્કમ દેખાઈ રહ્યા છે.

ફરિયાદ નોંધાવવા માટે સ્પષ્ટ સૂચના

એન્ટી-રેગિંગ કમિટીના અહેવાલ અને મામલાની ગંભીરતાને જોતાં, ડીન દ્વારા ઓર્થોપેડિક વિભાગના હેડ ઓફ ડિપાર્ટમેન્ટને તાત્કાલિક અસરથી પોલીસ મથકે સત્તાવાર ફરિયાદ નોંધાવવા માટે સ્પષ્ટ સૂચના આપી દેવામાં આવી છે.

ભોગ બનનાર મુખ્ય વિદ્યાર્થીઓ જ જ્યારે આગળ આવવા તૈયાર નથી

હાલ આ સમગ્ર મામલો ભાવનગરના નીલમબાગ પોલીસ સ્ટેશનની હદમાં આવે છે. પરંતુ ભોગ બનનાર મુખ્ય વિદ્યાર્થીઓ જ જ્યારે આગળ આવવા તૈયાર નથી, ત્યારે નીલમબાગ પોલીસ મથકે કાયદાકીય રીતે ગુનો નોંધાશે કે કેમ તેને લઈને અનેક સવાલો અને શંકા-કુશંકાઓ ઊભી થઈ છે. મેડિકલ કેમ્પસમાં રેગિંગ જેવી દૂષિત પ્રવૃત્તિઓ પર સુપ્રીમ કોર્ટની કડક ગાઈડલાઈન હોવા છતાં, ભાવનગરમાં બનેલી આ ઘટનાએ તબીબી શિક્ષણ જગતમાં સિનિયરોની દાદાગીરી અને જુનિયરોની સુરક્ષા સામે મોટા પ્રશ્નાર્થ ચિહ્નો ખડા કર્યા છે.

આ પણ વાંચો----     Gujarat Latest News Live : અમરેલીના રાજુલામાં પુલ પરથી ટ્રક નીચે ખાબક્યા બાદ ભીષણ આગ, એક વ્યક્તિ જીવતો ભડથું